L教授以前在理工大學教書，住在大學宿舍，叫做百德苑，位於沙田火炭。呢日L教授睇報紙地產版，話沙田九肚山八年未推新盤，即將有樓花推出，特色洋房單位最平入場費要三千萬元。
教授級人馬梗係冇錢買咁貴豪宅啦，但正如香港人心態，冇錢買樓都鍾意睇吓，於是睇真啲報道，發覺即將推出市場嘅豪宅位於「九肚山樂葵徑二號」，不禁笑到噴飯。L教授話：「我未做負資產業主之前，就係住響火炭樂葵徑二號百德苑，乜呢條路搬咗去九肚山咩？」教授之成為負資產，皆拜政府所賜，港英政府鼓勵大學教授買樓自住，搬離大學宿舍，每個月嘅房租津貼，可以用嚟供樓，如果唔買樓嘅，以後每年房租津貼逐漸減少。有此誘因，大學教授?職員紛紛搬走，最唔好彩嘅就喺九七年買樓，延至二○○○年買樓嘅，亦難逃厄運，直至最近樓價升番，佢哋先至舒一口氣。理工大學嘅百德苑宿舍就因為咁，人人搬走晒，十室九空，除咗要管理、交差餉之外，重要俾審計署批評，未能善用資源。潘校長正是佛都有火，於是將整個宿舍（內有十座八座住宅大廈）交番畀政府。L教授記得好似喺兩年前，政府將百德苑賣咗畀發展商，發展商將所有大廈拆晒重建，包裝成為豪宅，估唔到𠵱家話賣樓花，樂葵徑二號竟然位於九肚山。
L教授話：「嗱，揸車去睇樓，唔好笨到由大埔公路去九肚山呀，要在大涌橋路直入火炭工業區，轉入松頭下路上山，到盡頭轉左就係樂林路，已經見到舊百德苑。又可以入火炭轉去銀禧花園、駿景園嗰條路，一路轉上去。你如果揸車上到去九肚山搵呢個樓盤，架車行到冇油都未搵到！」