坊間盛傳新近加入行政會議嘅查史美倫係香港證監會下任主席嘅不二人選。曾分別喺中國證監會同香港證監會任高職嘅查太出任此職本也名正言順，之不過八方聽聞查太唔想再做證監方面工作，佢覺得做咗十幾年證監工作夠嘞，暫時只專注搞好行政會議嘅工作，或者搵多份兼職做就算。
查太喺國內出任證監副主席時，屬副部長級官員，成為香港人喺北京最高級官員，佢重有個好鬼抵死嘅綽號：「查死你們」，除咗因為同「查史美倫」嘅普通話發音相近外，亦凸顯佢喺證監工作方面死纏爛打嘅硬朗作風，有傳媒重封佢為「香港鐵娘子」。
八方聽聞查太當年得鐵面總理朱鎔基透過中間人搵佢上京任職兼親自接見，重勉勵佢要做好中國證監工作。得朱總撐腰，查太上任後果然堅守「無懼無畏、不偏不倚」的原則。之不過佢嘅硬朗作風喺國內得罪唔少人，「查死你們」嘅綽號好快就喺國內證監界傳開去。
查太獲委任中國證監副主席時，外界揣測係靠佢夫家背景，因為佢係愛國富豪查濟民嘅新抱，不過，查太就認為北京係睇中佢喺香港證監會嘅工作經驗。查太身份證都冇用夫姓，佢公事上用嘅中文名全部係「史美倫」，重一度令人誤會佢離咗婚㖭。
查太赴京任職初時，對自己嘅「煲冬瓜」自我感覺良好，但係一年後先有同事讚佢普通話進步咗，話聽得明佢講嘅所有嘢，佢先知道之前嘅普通話香港音太重。
老友向八方報料，話說查太在京任職三年半，最難捱唔係怕得罪人，而係大部份時間要獨守空幃，佢只能間中返香港同丈夫團聚，所以北京雖然想佢繼續做落去，佢都決定辭官返香港。而且北京天氣乾燥，對女人皮膚唔好，北京肥膩餸菜又食唔慣，都係返香港好囉。
（圖）查太𠵱家專心做行會工作，遲啲話唔定搵份兼職㖭。
資料圖片
傳真︰2623-9278
電郵︰