爆機狂迷：XBOX大作戰HALO2<br>16人網上激戰

爆機狂迷：XBOX大作戰HALO2
16人網上激戰

XBOX大作《HALO2》資料同相片大家睇過唔少，近兩年各大遊戲展都成為XBOX力谷遊戲之一，下星期終於正式推出，機迷終於可以自己親身品嘗，而今個星期，筆者就有機會喺遊戲出街之前，親身試玩《HALO2》！有玩開第一身射擊遊戲，自然玩得份外過癮，若果無玩開嘅更極力推薦各位一試。

記者、攝影：許福合

一個好玩第一身射擊遊戲，最重要係講求操控、畫面、玩法，一般對故事性要求唔高，試玩《HALO2》第一個觀感，就係故事性好強，用上唔少CG片段說明劇情，好似故事一開始太空站拆炸彈，就令人玩得份外緊張，而且場面震撼，睇落重好有星球大戰Feel！而且《HALO2》更會推出中英版，只要於XBOX上選定語言為繁中，就可以顯示中文字幕，更能掌握遊戲劇情，唔同一般射擊遊戲盲摸摸咁玩。

上Live!對戰
因為未正式推出，試玩時未能上到XBOXLive!，推出後可支援16人大作戰，變化更多，好似搶旗、佔地同一般戰鬥都有，還可以自己裝扮外形，選擇隊章，與朋友組軍作戰。而單機就最多可支援4人作戰，畫面將分割成4份，分別有對戰或合作等多種玩法，不過筆者就較愛合作模式，因為敵人難度較高，而且可坐上戰車或戰船作戰。戰車或戰船會分為駕駛及乘客席，必定要坐上駕駛席才能操控，否則會交由電腦控制。

■部份武器可以射到對手「變色」。

■敵人武器亦有好多款式，有啲好誇張。

版數多地圖大
有玩過上個版本，不難發現《HALO2》無論畫面到遊戲內容都多咗唔少，首先單係遊戲版數，已經有十幾個，各有唔同特色，而每個版圖都非常大，變化亦夠多，既有星戰式場景，亦有街頭槍戰，非常耐玩，而值得一讚係版圖雖大，但中途唔使任何存取動作，令人玩得特別暢快！而且武器種類夠多，有遠距離追擊武器，亦有射程近但破壞力較強槍，另外還新增雙槍玩法，不過用彈量大增，幸好打低敵人都會掉下武器同彈藥，可以不斷補充。最好玩係中途可駕駛唔同類型戰車武器，好似一駕大炮車，一炮一個，打得就最爽！

■2人對戰時，畫面將一開為二作戰。

■想坐戰船，將對手拉下來就可據為己有。

■這種大炮車威力驚人，一炮一個。

■換上雙手武器，攻力更強大。

送你《HALO2》精美禮品
下星期《HALO2》就會正式推出，XBOX今日搞咗個吳卓羲陪你打《HALO2》活動，時間為下午2時至6時，除咗可以第一時間玩到《HALO2》外，攜同今日本版親臨尖沙嘴海運大廈地庫「玩具反斗城」，即可免費換取《HALO2》手辦公仔乙隻、《HALO2》銀裝限量版乙盒或其他《HALO2》限量精美禮品乙份。數量有限，換完即止。

對應機種：XBOX
出版商：MicrosoftGameStudios
開發商：BungieStudios
類型：射擊　　語言：中文　　人數：1-16人
XBOXLive!支援：語音通訊、網上對戰、遊戲內容下載
系統支援：杜比5.1數碼音效、自訂背景音樂
推出日期：11月9日
XBOX客戶專線：800964215
售價：$299（限量精裝版$328）

機迷意見

■《HALO2》耳筒，用來玩Live!就最啱，不過暫時未知幾時有得賣。

■精裝版使用鐵盒包裝，包括有片段、訪問DVD碟。

電玩太郎：「敵人同武器都多咗變化，令遊戲Value增加咗唔少，較耐玩。」

Leslie：「畫面好靚，操控都好順，上網可16個人一齊打亦好吸引。」

Lorna：「以前較少玩第一身射擊，玩落亦覺得相當過癮刺激。」

Johnson：「最吸引係武器種類多，又可以雙手揸槍，打得好激。」

Apple：「合作模式有好多玩法，講求合作性，用嚟招呼朋友一流。」