米高摩亞「賀」連任　美軍亡魂砌布殊

荷李活導演米高摩亞（MichaelMoore）雖然拍咗套《華氏9/11》唱衰喬治布殊，但最終都係無阻佢連任美國總統。米高自喬治布殊獲選連任以嚟，心情都唔多靚，佢前日就喺自己個官方網頁度，用咗千幾位喺伊拉克陣亡嘅士兵照片，砌咗喬治布殊個樣出嚟發洩！

「呢日係黑暗之日」
米高摩亞知道喬治布殊連任美國總統之後，即刻喺個人官方網頁www.michaelmoore.com 入面好傷心咁話：「呢日係黑暗之日！我們的確輸了，但我絕對不會認輸！」佢為咗令人唔好忘記喬治布殊出兵攻打伊拉克有幾錯，喺網頁上列咗千幾位喺呢場戰爭上陣亡美軍嘅名，重用佢哋嘅照片砌咗布殊個樣，十足十占基利（JimCarrey）套《真人Show》嘅宣傳海報。
而Miramax電影公司老闆最近因為擔心米高摩亞嘅安全，出錢幫佢請咗兩個保鑣，不過米高話：「我同老闆講，如果你擔心我嘅安危，幫我請營養師至啱！」

羅拔烈福吹水
此外，有傳影星羅拔烈福（RobertRedford）曾表示喬治布殊連任後，佢會搬離美國到愛爾蘭生活，不過佢嘅發言人已經否認羅拔有咁樣講過。而另一位唔支持布殊嘅音樂人Moby，認為美國人正生活喺一個分裂嘅國家，不如就將美國分成三個國家。