當寵物是寶的大有人在，Dogo跟丈夫則當寵物是孩子，孩子有侏儒兔和龍貓兩家人。一屋兩家三姓「人」住在同一屋簷下，加上其他寵物一共十六口。主人房有窗有空調，風涼水冷，不過主人Dogo反而唔住，讓晒畀寵物，並且幫牠們起埋屋，自己就同丈夫住客房，無窗無景，呎數差一截仍甘之如飴，果真親情無價。
記者：邵超
攝影：楊錦文、伍慶泉
侏儒兔一家五口，分兩籠居住：父子一籠，母女又歸一籠。爸爸叫糖糖，姑且叫牠們「糖家」，娶了栗子為妻，好一個「糖炒栗子」，難怪牠們咁甜蜜。兩兔從寵物店回來的日子，剛好是十一國慶和雙十節，非常特別。糖家本來要絕後，Dogo說就在糖糖絕育前一天，糖糖同栗子的一夜情就搞出三條「人」命：「原本諗住俾佢風流一次咁多，點知後來發覺栗子愈嚟愈肥，先知佢有咗。後來睇書至知兔仔有性行為至會排卵，十次有九次中獎。」
三個小朋友紅豆、眉豆和黑豆並稱「三豆」，懷胎一月出生，遺傳爸爸的基因居多。黑豆最似媽咪，一家人數爸爸糖糖最瘦又最型。Dogo最初睇書知道兔媽媽唔識湊BB，好彩栗子都幾有媽媽風範，餵奶似模似樣。「栗子自己最鍾意扮BB，抱住佢好Sweet。」望住栗子，我會諗起PetertheRabbit彼得兔。
住在侏儒兔樓上的龍貓夫婦噹噹和奀妹，跟隔鄰的晴晴都係夜行性動物，日頭瞓覺多過食飯。為咗配合牠們鍾意玩的性格，Dogo特別設計咗高身的籠，配置數條高低不一的原白木條方便牠們擒高擒低，並且安裝埋滾筒和做草球。
三隻龍貓中，Dogo最錫晴晴，由兩個月開始睇住佢一日一日咁大，零舍有感情。「其實佢唔係最乖，以前好臭脾氣，唔鍾意就會唧尿畀你歎。」
兩公婆之中奀妹的頑皮事不比晴晴少，01年9月由愛護動物協會來到Dogo家，很快就教壞老公噹噹周圍小解。Dogo說：「她本來唔鍾意沖涼，成日敷衍沖吓就算；𠵱家反而鍾意咗沖涼，成日推噹噹出去沖涼房，搞到噹噹惟有在房門口碌嚟碌去。」香港女仔出名刁蠻，估唔到龍貓都係咁。
其實Dogo家何止糖家、噹家和晴晴，重有西施狗仔仔、三隻龜、一條魚同小倉鼠Q仔，重有90多盆迷你蘭花。大家各有各的舒適的家，不過外面空間較窄，「出街」自然有衝撞。Dogo的家族史，記載咗狗仔仔與兔栗子的結仇經過：仔仔唔小心踩親栗子，栗子反咬仔仔，從此仔仔每次見到栗子都會鬧足佢祖宗十八代（吠～～），唉，希望牠們明白家和萬事興的道理啦……
Dogo與寵物的故事可算是一段遷徙史，大家都搬慣家。Dogo鍾情長毛的動物，丈夫愛屋及烏：先是寵物由BB長大成「人」，舊時的鐵籠變為現時的「獨立洋房」，四個籠均由丈夫度身定做，後來更調換房間。「佢哋間屋唔係太難整，放假喺屋企抽時間做就得。龍貓櫃做咗日半，兔籠就做咗兩日，材料夾埋都使咗幾百蚊。」
一房中四個單位三個家庭，兔子和龍貓做樓上樓下鄰居，但老死不相往來。問Dogo牠們可以放在一起嗎？「唔會呀！點知會發生甚麼事！」
主人兩口：Dogo＆丈夫
糖家五口：公兔糖糖、母兔栗子、兔女紅豆&眉豆、兔仔黑豆
龍貓兩口：老公噹噹、老婆奀妹
獨居龍貓：晴晴
一隻倉鼠：Q仔
一條金魚：無名氏
一隻狗：仔仔
三隻龜：炭球、小丁、冰糖
