「揀人要付出時間感情」
超瓊寧愛玉石不愛男人

賭王何鴻燊千金何超瓊及顧紀筠，昨日往灣仔為國際時尚翡翠玉石首飾設計大賽擔任評判。何超瓊妙論翡翠與男人，指寧要翡翠不要男人，她表示選錯翡翠最多呻笨，但選錯男人則會賠上時間與感情。

賭王何鴻燊千金何超瓊及顧紀筠昨日往灣仔君悅酒店，為國際時尚翡翠玉石首飾設計大賽擔任首席評判。
何超瓊表示首飾中，她獨愛翡翠玉石，閒時有看書研究箇中學問，所以懂得分辨玉石的真偽。
超瓊說：「我都有些少翡翠玉石收藏，最鍾意嘅就係荷蘭豆形嘅耳環、一串翡翠珠頸鏈，同埋細個外婆送畀我保平安嘅雞心玉。」

怕男人有腳會走
問超瓊揀男人困難，還是揀翡翠難？她哈哈笑說：「都係揀人難啲，翡翠玉石可以慢慢研究，物品嘅嘢如果高價買入，最後發現佢價值原來好低時，最多呻笨啫，但係揀人嘅過程中大家要付出時間同感情，我都係寧願鍾意玉石多過男人啦，起碼玉冇腳唔識走，鎖佢喺保險箱就冇得走。」
而修讀過珠寶鑑證的顧紀筠亦指分辨翡翠最困難，她說：「因為玉係有生命嘅。」她透露現正為無綫台慶夜的戰衣費神，她說：「我會搵人度身定做，今年唔會好似舊年着紅色咁誇張，咁多阿姐喺度，費事搶人鏡啦。」
採訪、攝影：JessicaNgan