美股前晚形勢大好，杜指勁升177點，油價則跌至5周低位，港股點可以唔升？恒指高開129點後，全日在高位徘徊，收市升125點，好友未有去盡，似有所待，可能想睇埋昨晚公布嘅美國就業數據，以及聯儲局下周三議息之結果。
恒指C輪：大市升逾百點，昨日提過嗰3件恒指C輪，均有進帳，4538升8.3%，4444彈高8.4%，4442最叻，升8.9%。經過昨日變化，4444同另外兩件比較，依然最抵買，溢價只係2.6%，明年3月尾到期，槓桿率16.2倍（有效9.8倍），引伸波幅19.5%。4442同日到期，溢價2.7%，槓桿率16倍（有效9.7倍），引伸波幅19.9%，一比之下，4442輸個馬鼻。
新世界C輪：地產股開始有勢，新世界（017）標青，搶高3.5%，收報7.45元。威水輪第4名，係新世界C輪9560，飛升4成，由1仙彈上1.4仙，全日得1宗成交，金額萬四銀咁大把，呢件係非標準輪，落場前記住睇清楚條款。想玩新世界標準C輪，得1件9667，冇得揀，明年2月17日屆滿，溢價13.7%，槓桿率18.7倍，引伸波幅42%，唔算抵買。
國壽C輪：國壽（2628）昨日只係微升1格，彈高5仙，收5.2元，但有幾件國壽C輪好醒神。成交一向最旺嘅2143，是日大升24%，收報29仙；9035跳升8%，報91仙；4475升11%，報55仙。呢3件C輪都係1輪兌1股，正股升5仙，佢哋理論上最多升5仙，但實情係3件都升多過5仙。正股近兩個月多次挑戰5.25元，話唔定呢次破關。
章盛