劉德華和內地名導演馮小剛昨天到海逸酒店出席《天下無賊》記者會，老闆林建岳亦有出席。今年華仔與梁朝偉在台灣金馬獎再度碰頭，同角逐男主角獎。
雖然華仔近年都有被提名，但前兩度提名均落敗，不過他仍表示有信心奪獎，並會出席頒獎禮，他笑說：「冇得唔支持，用學嘢嘅心情去，唔會因為攞唔攞到獎而去，等佢哋（大會）內疚吓。」至於幾年來華仔每次出席頒獎禮都空手而回，他說：「所以佢哋咪內疚咗好多年囉！」
於活動上，電影公司播出《天下無賊》中華仔戴上假髮的片段，華仔稱香港人覺得他這個造型似足鄭少秋當年《大時代》丁蟹的角色，而台灣人則覺得他像周渝民。《天》片將安排在聖誕檔期上映，與周星馳的《功夫》碰頭，華仔說：「其實兩套戲都唔同類型，導演以往都係拍喜劇，今次轉型都會有壓力㗎！」
此外，華仔接受電視台訪問時，身旁有人提醒他有亞視的咪，華仔隨即把咪牌拆掉，還叮囑記者不要影相，以免被人杯葛。
採訪：魯萍
攝影：何國豪
