美國選總統塵埃落定，恒指升過88點，又跌過70點，埋單唔見28點。趁消息出貨，市場常見現象。隔晚美股開市7分鐘，杜指即彈升178點（埋單升101點），好明顯股民鍾意布殊做總統。美中不足，油價升番，大選前好多專家都話布殊做總統會令油價上升。不過，油價始終價高勢危，遲早回落去。到時，美股隨時癲上去，港股升多幾百點，冇乜難度。
恒指C輪：個市有得睇，買恒指C輪。10大成交金額窩輪中，着咗3隻齊齊明年3月到期，佢哋係4444（個冧把好易記）、4442、4538。3輪拍埋一齊比拼，最值得買嘅係4444，尤其拍埋4538，靚晒。4444槓桿率輸4538大約1/4（17.5倍與23.2倍之比），但溢價慳番3個百分點（3%與6%之比）。唔鍾意槓桿率輸蝕1/4（用有效槓桿率計則冇乜輸蝕，10.2倍與10.5倍之比），可以將注碼提高1/3，如此這般就同賭4538有一樣贏輸銀碼嘅效應，但慳咗3個百分點溢價。3個百分點，代表恒指400點，慳得好和味。
中電信C輪：網通（906）有招股資料後，中電信（728）郁郁哋，收2.525元，升1格，有得睇，買C輪4499。
章盛