鄭希怡（Yumiko）臨近年尾大出血，上月已花了二十萬元搬往港島半山東山臺的千三呎豪宅，雖然她數月前因炒車而導致全車損毀，但Yumiko表示因豪宅包車位，故會再買車，今次會以十萬元購二手歐洲車代步。
鄭希怡於上月初由西半山列堤頓道的八百呎寓所，搬往港島半山東山臺的千三呎豪宅，愈住愈豪的她其實在今年內大出血，因她除花約二十萬元搬屋外，早前更炒車令全車嚴重損毀，故Yumiko又要再花約十萬元購入一架二手歐洲車代步。
Yumiko日前在銅鑼灣接受本報訪問時表示，最初曾親自出馬睇樓，睇中後才請風水師研究，但最後卻演變成由風水師為她揀屋，她解釋說：「睇屋最緊要啱feel，有次我睇中一間，但風水師睇完之後話間屋乜都好，不過住咗之後會入院割一刀，我即刻猶豫，點知嗰刀係割落邊度呀？好驚吖嘛，所以後尾至畀個師傅幫我睇樓。」
由於新居包車位，故早前才考取車牌的Yumiko在炒車後，再計劃買車代步，她說：「我買咗架車一個禮拜就炒車，撞到成架車出晒煙，重聽到滴水聲，架車買入三萬幾，整番就要成萬幾，不如買過架，我諗住買架二手嘅歐洲車揸。𠵱家我租屋住要四萬蚊一個月，我有諗過第日會唔會辛苦呢？我同家人商量過，都覺得開支突然大咗，但人生在世，返到屋企都想舒舒服服，有啲空間畀自己唞吓氣。」
Yumiko續說：「我間新屋包埋車位，冇理由唔揸車啫，我又唔覺得自己揸車係咁恐怖，反而覺得都OK，嗰次可能係緊張啫，算啦，之前我畀咗好多時間同心機排《十一團火》演唱會，今次大出血就當獎勵自己囉！」
採訪：朱倬誼
攝影：陳慧安
服裝：Max&Co
場地：CLUB1516（CausewayBay）
