肥仔K自英國回港，小休之後再去深造，中午飲茶之時，飲飲吓走咗去遊戲店打機，見到成班細路，小學生、中學生、大學生都有。肥仔K已經讀完大學，俾細路豪挑戰：「咁大個仔重嚟蝦細路，有冇搞錯呀？」肥仔K為之氣結。肥仔K出世之時，任天堂剛剛開始打入市場，推算來，肥仔K自打Mario、SuperMario開始，係香港第一代自細打機打到大嘅一代，佢舊年去到哈佛探一位年紀比佢大兩年嘅香港留學生，讀緊博士班，兩人一見面，二話不說，就上網對打，博士生打咗一晚通宵，先至肯去做T.A.（教學助理），為本科生上討論課。肥仔K話：「哈佛高材生咪一樣打機？」言下之意，父母不必阻止細路打機。
其實父母亦阻止無從，冇晒符。細路豪最近俾父母捉到佢講大話，懲罰佢一個月唔准打機。細路豪對肥仔K講：「我今日坐滿監，奉旨打機㗎，你唔好霸我個位。」今時今日之男仔，大多如此，父母最大嘅挑戰就係如何與電腦?遊戲機爭奪時間，引誘細路讀書、睇書、作文。細路豪媽咪叫肥仔K唔好掛住打機，得閒唔該教細路豪作文，肥仔K於是出一條題目：「我的睡房」，要寫二百字，細路豪一於話唔識點寫，一個大學畢業生拿一個小學五年班學生沒辦法，冇計。
寫「我的睡房」二百字，算係乜類訓練呢？肥仔K話：「中四時候去美國讀暑期班學英文作文，老師出一條題目，例如：『我的睡房』（MyBedroom），第一日交一百字，第二日交二百字，到咗星期五，同樣呢條題目要寫足五百字，目的係要訓練我哋嘅觀察力，日日在原有基礎上，加多啲detail，描寫細緻一啲。最初真係寫得好辛苦，寫得多咗，俾導師修改到滿江紅，就覺得執筆為文，小事啫！」