每逢樓市急升，都會吸引炒家摸貨圖利，十月份土地註冊處共錄得三百一十七宗住宅摸貨登記，比九月二百七十四宗，多近一成六，但相對整體二手住宅嘅比例就輕微下跌零點二個百分點，只得四點四巴仙。
一手樓仍然係炒賣焦點，其中薄扶林貝沙灣，係十月摸貨獲利幅度最大嘅屋苑，呢個盤今年好多個月嘅摸貨登記中，都穩佔獲利幅度最大第一位。
原因係摸出嘅單位，都係喺舊年樓市低潮時入貨，趁今年樓價高漲時沽出套利。
十月份獲利幅度最高嘅貝沙灣五座高層B，舊年五月嘅買入價係七百二十三萬八，上月以一千二百八十萬摸出，賺咗五百五十六萬二千，幅度近七成七。而另一個五座高層A，都以賺幅六成九嘅一千一百萬元摸出。美聯劉嘉輝話，預期十一月嘅摸貨註冊量，重會進一步上升。
華懋吳崇武噚日喺一個賣樓嘅宣傳會上，講起佢哋觀塘同旺角兩個工業轉酒店發展項目嘅補價case，話政府提出嘅補價，每呎要成千三至千四蚊，同佢哋預計嘅五、六百蚊相差好遠，所以先會上訴。
呢兩個項目夾埋總樓面大約十九萬三千方呎，即係華懋要補超過二億五，計番每間房地價都要成六十萬，加埋其他成本就要成百萬，如以𠵱家三星級酒店每晚房租五百蚊，七成入住率計，年回報率大約有成十三厘，如果未來十年旅遊業都好景，咁應該唔錯嘅，但邊個可以擔保。
東半山東山臺18號頂層連天台單位，Twins成員亞嬌鍾欣桐曾經租住過，剛以一千零五十萬易手，六千一蚊呎，代理屋之島歐志康話，呢個由名牌發展商新地起嘅低密度屋苑，八年樓，只得十二個單位，雖然設施欠奉，但勝在私隱度夠高，兼有一望無際嘅馬場景。
聽聞亞嬌自己喺呢個單位住過十六個月，月租三萬幾，單位間隔不俗，主人套房近三百呎，重有另外兩間房足夠擺放亞嬌啲靚衫。
樓市多人關心，相關行業都要加強宣傳，提高公司知名度，希望吸引多啲客幫襯，而網頁係其中一個途徑。從事樓按轉介生意嘅經絡集團，都有個網頁面世，裏面有齊合作嘅銀行，重有一啲常見嘅樓按問題，同埋轉按慳錢嘅例子。
通常講到轉按嘅供款問題，好多人都唔識點計，都係聽有關公司講至知，經絡針對呢個問題，喺按揭計算機之外，再增設多一個轉按計算機，等啲想轉按嘅業主，事前可以計到慳到幾多息，係咪制得過，果然照顧周到。
發展商賣樓，搭建示範單位畀公眾參觀，司空見慣，但地產代理自行搭建示範單位，就第一次聽聞。
新世界發展嘅西環泓都新盤，宣傳攻勢如火如荼，中原地產喺區內卑路乍街租咗個一千八百呎舖位，唔單止專門做呢個盤，重認真到按住發展商畀嘅樓盤藍本，搭埋個廚房、廁所同露台畀客睇，中原執董陳永傑重話，成間舖連裝修，用咗一百萬。
陳永傑講，泓都賣完之後，示範單位嘅所有物品，有機會送畀買家，或者用嚟抽獎，物盡其用咁話。
雖然個盤重未開賣，但已經有附近海味店老闆，大手入票十五張。
明星效應已經成為發展商促銷樓盤嘅必殺技之一，連內地樓盤都跟風採用，和黃嘅珠海海怡灣畔，上個禮拜日同新城財經台合辦實地睇樓團，請嚟證券界名人胡孟青做嘉賓，分享地產投資心得。
和黃話海怡灣畔三期，上個月首次喺本港推出，重三度加推，至今累售逾一百五十套。由於發展商提供樓價兩成免息首期貸款，還款期六十個月，另八成樓按重可以有一年免供本優惠，變相即係零首期。
電郵地址：
