熱愛公益活動的黎姿，日前抽空與十多位智障及殘障人士同遊海洋公園，其中四位需要坐輪椅的傷殘人士，黎姿更親力親為替他們推輪椅上山，雖然相當吃力，但黎姿笑言既可令人快樂，又可以減肥，一舉兩得。
黎姿憑無綫劇集《金枝慾孽》玉瑩小主一角人氣急升，雖然工作接踵而至，但她日前仍抽空邀請十多位來自東華三院賽馬會復康中心的智障及殘障人士同遊海洋公園，黎姿更親力親為推着坐輪椅的人士上山。
黎姿說：「其實令人開心，自己都會好開心，乜都落手落腳做，感覺溫馨重可以減肥，真係好過行街shopping。我覺得佢哋好需要多啲人關心，希望社會多啲注意，可以畀多啲就業機會佢哋。」
一班智障及殘障人士難得出外遊玩，他們一見到黎姿，都顯得十分雀躍，儼如小fans般嚷着要合照，黎姿當然不會讓他們失望，一行人在門外大合照後，便向着海洋公園纜車站出發，途中大家有講有笑，十分融洽，黎姿說：「我覺得好有意義，加上我已經有七年冇去過海洋公園，今次可以同佢哋一齊去玩，真係好開心。」
黎姿在海洋公園內又與他們玩機動遊戲，雖然有點害怕，但仍硬着頭皮陪玩，之後黎姿更體貼地親自送上汽水，各人都開心得大叫：「多謝黎姿姐姐！」
黎姿說：「我覺得佢哋真係好純真，我臨走嘅時候，重有一個女仔攬住我話十分之唔捨得，真係好感觸。」
採訪：陳月萍
攝影：陳慧安
