港股噚日先升後回，早段恒指曾高見13485，但午後反覆回軟，結果收13369，跌28點，成交仍暢旺，有173億元。期指則轉強，收13365，低水收窄到只得4點。
大市連升3日後，回一回好正常，事實上，13400至13500呢個阻力區，第一次上試，衝破機會唔大，短期內，大市仍會反覆上落，在13200至13500間整固。
國企好得1日，又唔得，大行雖睇好後市，但似乎仍有所待。以中國鋁業（2600）為例，雖有大行推介見6元至7元，但亦見到佢哋枕住沽，問題唔係佢哋出口術，而係要發動升勢嘅時機未成熟而已。
就好似遠東發展（035），未大升之前，亦見到大行嘅「些那」㩒到實一實，好多人都被嚇親，甚至沽貨離場，但佢哋一鬆手，股價就如脫韁野馬，3日之內，大升45%。大行只要收夠籌，就會係咁做上去，遠展噚日收3.2元，見4元亦非冇可能。
銀建國際（171）停牌，消息係配股，而且配20%咁多，但接貨者只係1個，而且來頭甚猛，有話係全世界最大嘅花旗銀行，亦有話係由花旗搭路，安排GECapital入股。銀建搵到美資大財團入股，目的相信只有1個，就係借助佢哋之力，處理不良資產，在美國出售。若估計無誤，銀建肯定成為信達處理不良資產的旗艦，未來的「交易」，「晒士」亦會愈來愈大。重有一點，就係美資今次肯高價要貨，對股價應有利好刺激，中線好大機會「坐四望五」。
安德利果汁（8259）整固成個月後，噚日終於再發力，高收1.06元，升7仙，成交更大增到2500多萬股。安德利12日宣布第3季業績，大家唔應該有太大期望，因為去年第3季係非典後嘅付運高峯期，不過，全年盈利就會幾理想，最重要係未來兩年，有新生產線同果膠廠投產，盈利將可大幅上升。
安德利係基金股，好大機會係另一隻大成生化（809），以05年每股盈利9仙，06年再上升到12仙，以15倍PE計（大成23倍），1年目標價係1.8元。講番走勢，噚日突破上升三角形阻力，且有大成交支持，照度上去，短線目標係1.3元。
郭兆誠