劉家輝去年拍攝首部荷李活電影《標殺令》後，令他成功闖入外國市場，但劉家輝表示與奧瑪花曼在片中對打要遷就對方，壓力甚大，而閒時他會與一班好友夾band減壓。
劉家輝自七五年加入邵氏後拍攝過不少經典電影，首部擔正的電影《少林三十六房》最令他刻骨銘心，八六年曾經離開邵氏，不過後來再到了TVB拍劇，他說：「我覺得大銀幕去小銀幕冇分別，只係買飛入場同唔使買飛嘅問題，而且當時入咗TVB，我都學咗好多嘢，對我演藝生涯幫助好大，只係表演層面唔同。」
對於去年闖荷李活拍攝首部電影《標殺令》，更能與女主角奧瑪花曼對打，劉家輝自言壓力大，他說：「因為我揹住香港人嘅包袱去拍，除咗要打得靚之外，重希望用自己嘅實力去拍完成部戲。當時一拍全場靜晒，所有鬼佬好似睇show咁。我自己好想一take過，但唔代表對手同導演可以，始終奧瑪花曼又係女仔，有起乜事受傷同失誤都會係我錯，因為我經驗多過佢，而且佢成六呎高，同我對打都好辛苦。」
入行快將三十年的劉家輝一直以武打形象出現，但原來他閒時亦會與三五知己夾band，除了唱歌外，就連打鼓及彈結皆精，早前更花了五十多萬設置私人band房，他說：「我自細就開始玩音樂，雖然我一入行就成為功夫佬，但我一直冇遺忘音樂，不過我又冇諗過做歌星，只係平時同幾個好朋友一齊夾band玩吓！」
採訪、攝影：王崇穎
