布殊大選連任勝利，中國國家主席胡錦濤拍發賀電，讚不絕口：「自你任總統以來，中美兩國在眾多領域的合作取得重要進展，給兩國人民帶來了實實在在的利益，對促進亞太地區和世界的和平與發展也起到了積極作用。」
吓？「布殊促進世界和平與發展」？咁又離奇喎！因為喺前一日，中國「外交教父」錢其琛喺官方《中國日報》撰寫專文，大罵布殊「自我膨脹」，又大罵佢想「統治全世界」㖭！
阿胡嘅賀電，不但向布殊高度擦鞋，反而重大讚布殊「促進世界和平與發展」，呢一句更係明摑白頭錢一巴，同時向布殊交心：現時嘅中國外交，係阿胡話事，唔係「外交教父」話事，白頭錢口衰犯錯，由阿胡去燒溪錢認錯。正如鄧小平當年講：我說才是正式的，其他那個黃華耿颷亂噏，係胡說八道。
喺阿錢嘅維園阿伯眼中，布殊「企圖統治全世界」，罪大惡極，但係喺胡主席嘅國際視野之內，布殊統治全世界，即是「促進世界和平」，功在人類，表面好似互相掌嘴，但查實喺自相矛盾之中，又好和諧。因為好簡單，布殊美國統治咗全世界，世界和平就更加有保障。布殊向全球邪惡軸心及其同路人開火，人人都應該響應支持，全中國十三億人民，應該好好學習胡總賀電精神，高度認識到布殊「統治全世界」，即是「積極促進亞太及世界和平」呢個真理，因此，布殊連任，對於我哋十三億祖國人民，實在係較楊利偉飛上太空更加盛大嘅喜訊！
大陸網民、維園阿伯兼親中Lai共嘅三流時事評論人，亦應重點學習胡主席賀電講話，由即日起，全心全意堅決擁護布殊總統促進世界和平及亞太發展，因為布殊為中國人民帶來「實實在在的利益」，包括開放留學簽證畀啲北大清華生，以及畀啲高官喺美國買房地產而不予凍結沒收等等。因此，胡總嘅賀電指示好清楚︰邊個膽敢再大罵布殊，即是與世界和平為敵，亦係破壞中國利益嘅人渣狗屎堆！
八方一向高瞻遠矚，撐布擁殊不遺餘力，今次得到胡總跟進附和，胡總賀電，措詞絕不肉麻，而係客觀中正，同八方英雄所見略同，都幾令人欣慰。布胡同心，其利斷金，反布殊，即係反胡總，世界六十億人，有布殊最高領導，和平有望嘞，讓我們團結在布殊核心周圍，聽從胡總號召，更好地支持布殊加大打擊邪惡軸心嘅力度嘞！
傳真︰2623-9278
電郵︰