荷李活女星茱莉亞羅拔絲（JuliaRoberts）經常喺乜乜荷李活權力榜上名列前茅，佢亦覺得自己嘅一姐地位冇人可以代替，難怪佢最近因為自己個名喺《盜海豪情》續集《Ocean'sTwelve》嘅宣傳海報上，排得後過嘉芙蓮薛達鍾絲（CatherineZeta-Jones）而大發雷霆！
預產期喺明年一月嘅茱姐最近因為新片《Ocean'sTwelve》嘅海報排名而搞到唔可以平靜安胎，聽聞佢知道自己個名喺海報上面冇得同主角佐治古尼（GeorgeClooney）、畢彼特（BradPitt）同麥迪文（MattDamon）並排，已經令佢好唔高興，但令佢更加覺得冇面嘅，就係今集先至加入嘅嘉芙蓮薛達鍾絲，竟然個名喺海報上排得高過佢！
雖然有人話茱姐私底下同嘉芙蓮關係良好，但佢始終覺得自己係金像影后，由片酬、攞過嘅獎到影壇地位，都威過嘉芙蓮，冇理由排名會輸畀佢，茱姐正要求電影公司將自己個名擺番上前。有個電影行內人話：「雖然茱姐為咗呢件事發嬲好似好小器，但排第一喺荷李活好重要，咁至代表到你係巨星，話晒都係做生意嘛。」