美國大選舉世關注，民主黨李柱銘近日亦身在美國，不過佢唔係去觀戰，而係去攞布瑞南人權獎（WilliamJ.BrennanJr.HumanRightsAward），呢個獎唔係唐人街維威喂式，而係有國際份量，係由一個致力維護言論自由嘅組織ThomasJeffersonCenterfortheProtectionofFreeExpression設立，目的係表揚世界各地維護言論自由嘅法律界人士，馬丁係首個獲獎華人，除咗有五千蚊美金獎金，個大名重會鑄喺美國高等法院一個牌匾，名留青史，真係港人之光。馬丁攞獎時話呢次唔係佢個人獲獎，更代表香港人為民主自由奮鬥獲國際肯定。
馬丁揚威美國，中國例牌嘟長個嘴，據當地報章報道，中國駐紐約總領事館官員曾提出「抗議」，重話香港事務係「中國內政」，希望美國唔好做出有損中美關係嘅事，主辦單位梗係睬佢都儍啦，重好大方咁邀請對方出席頒獎禮表明立場，中國官員梗冇膽露面。前外長老錢說三道四，指手劃腳謾罵布殊，唔知算唔算做出有損中美關係嘅事呢？
傳真︰2623-9278
電郵︰