金馬獎前日公布咗入圍名單，王家衞執導嘅《2046》雖然有木村拓哉、章子怡、梁朝偉、王菲、劉嘉玲、鞏俐同張震一班紅星演出，但結果只有偉仔同章子怡入圍角逐影帝影后，其他全部冇份玩。事後大會評審之一嘅許鞍華（Ann）解釋話：「鞏俐、王菲同木村拓哉其實表現好突出，但佢哋戲份少，澤東提名佢哋角逐男女主角獎，冇選擇提名配角獎，減低咗佢哋嘅入圍機會。」
另外，今年憑《忘不了》攞咗香港電影金像獎「最佳女主角」嘅張栢芝，今次喺金馬獎就影都冇，馮仁昭都覺得幾奇怪，後尾阿Ann話一班評審為栢芝應唔應該入圍拗咗好耐，結果到最後一輪投票，栢芝都係俾評審淘汰咗。阿Ann又話王家衞入唔到「最佳導演」係因為《2046》超越唔到佢以前嘅作品，所以喺第三輪投票就俾評審淘汰咗。
至於王家衞已經搵到金像影后妮歌潔曼（NicoleKidman）拍成本近二億港紙嘅新片《TheLadyFromShanghai》，雖然未公開劇本，但近日世界六間著名嘅電影發行商已經表示有意買入呢套片嘅發行權，當中包括發行唔少荷李活大片嘅美國發行商SummitEntertainment。
「2004電視節目欣賞指數調查第三階段調查」昨日公布結果，由七月至九月期間，無綫嘅人氣電視劇集《金枝慾孽》同《棟篤神探》分別排行第三同第十四位，而播完冇幾耐嘅《青出於藍》就排行第二十八位，成績都算幾理想。
陳苑淇噚日到九龍灣出席商台活動，舞台上設計咗粒大星星作為歌手出場嘅地方，令到好多着咗短裙仔嘅女歌手一跨過粒星星時表現得步步為營，怕唔小心走光。陳苑淇都着咗條好短嘅裙，加上佢嘅高度又有番咁上下，所以佢出場嗰陣馮仁昭都好驚陳苑淇失儀，好彩佢就最後小心翼翼咁出嚟。
趙文卓日前拍電視劇《七劍下天山》時受傷，飾演楚昭南嘅佢，其中一幕要受酷刑。趙文卓嘅四肢要用繩綁住懸空，由四匹馬分別拉住，但係一個女工作人員忍唔住咳咗一聲，令馬匹受驚亂動，好彩在場嘅騎師即時拉住啲繩，唔係趙文卓就真係被「四馬分屍」。
言承旭早幾日先嚟香港會fans，我馮仁昭都有去到，場面鬼死咁墟冚，大家都情緒高漲，言承旭亦都開開心心咁返番台灣。不過，身在外地嘅言承旭噚日就入稟高等法院，指《東方新地》於今年八月十八日刊登嘅一篇封面故事，內容涉及誹謗，有損言承旭嘅聲譽，要求法庭頒令禁制《東方新地》再刊載有關報道，並要就事件作出賠償。案件編號：HCA2506/04
蕭正楠（Edwin）早前同盧巧音出席一個商台活動時，因為穿着未有申請嘅警察制服而要協助警方調查，但係Edwin一直都喺內地橫店拍劇，未能配合，所以佢今日返到嚟就會即刻被召去警署。噚日記者打去唱片公司求證，Edwin助手話：「如果需要我哋協助調查，我哋會盡量配合。」
