美國總統大選有了結果，布殊大勝。昨天下午五時零三分，在維園公廁，兩個維園阿伯蹲在廁格，隔着一堵牆，同時在暢論天下大勢。
「布殊終於贏咗。聽啲愛國報紙講，美國五十個州，兵家必爭之地嘅只有三個州：一個係窟州、一個係賓州，另一個係噢Hi哦喎。」維園阿伯甲打了個飽噎。
「係囉，上趟投票，阿戈爾咪喺個窟州裏面嗌上訴，話點票有問題囉。」維園阿伯乙點着一口煙，瞇縫着小眼睛，記性靈光，一面回憶着四年前的時事。
「今次聽講選呢三個州，布殊選贏咗個窟，不過克里就選到個賓州，而個噢Hi哦呢，就俾布殊選到喎。」阿伯甲複述着剛剛從電台新聞聽來的最新消息。
「唉，俾你克里選到賓州，有××用咩，即係入咗個長毛啫嘛。」阿伯甲以林旭華的口氣補充說：「布殊選到個噢Hi哦，即是好似我哋港島北角有阿蔡素玉贏番，咁你民主派都冇着數吖。」
阿伯乙沉默了十秒鐘，在廁格裏，低聲呻吟了兩聲，像是在用着力，進入了狀態。阿伯甲以為他出了事，大喊：「喂，聽唔×聽到啊？」
「聽到。」一聲悶響之後，阿伯甲如釋重負：「布殊想選賓州，聽香港電台周融講，賓州嗰邊啲位都好迫夾，賓州人有知識，憎死布殊，唔通好似窟州咁賤咩，邊有位畀佢插入嚟吖。噢Hi哦就唔同嘞，個噢Hi哦夠大，布殊殺到入去，大把位有得走棧，俾佢選選吓，咁咪博到懵食到個位囉。」
「咁點解克淫頓都肯出來挺克里呢？」阿伯乙轉換話題，一面用手上的報紙沙沙地清擦着：「睇佢個樣咁殘，都要幫克里吹雞，好似有啲內幕喎。」
「哦，」阿伯甲俯首看看，往下面吐出一口青痰：「喺蛋糕亭嗰邊九叔、老陳、崩牙張佢哋成班老友講，係克淫頓當年落台嗰陣，同布殊講到明，只准布殊做一屆，克淫頓指定克里係四年後嘅美國領導人。布殊應承咗，咁克淫頓先至肯交班。嘿點×知布殊個衰仔反悔，做滿咗四年，又想玩多四年，克淫頓見到佢咁忤逆，於是咪南巡發表講話，瞓身挺晒個隔代接班人囉。」
這時，一個警察走進來，看見兩個廁格緊閉着，還有點異聲，警惕地敲敲鐵門問：「喂，裏面有幾多個人？」
阿伯甲不耐煩了，隔門大喊：「本來就有兩個，總統個位就得一個，啱啱贏咗個佛州，𠵱家重選緊賓州㖭！」