李澤楷隻8號仔電盈終於有息派，雖然每股得五仙半，都好過冇。不過小股東唔係好開心，皆因股價跌，噚日連四個八都守唔住，收咗息都補唔番。
有錢賺又有息派，點解都要跌？八方唔明，於是問知情人士。佢歎晒氣，話係因為同大陸網通合作單嘢，傾極未拍板，重傳到話會告吹，所以股價受壓。聽聞小小超都好唔開心。
最大鑊係網通個主席張春江，前日在香港見記者，竟然爆咗句「可能不達成協議」，鬼報攞嚟做頭條，8號仔有乜法子唔企咗喺度？咁實在談判咗咁耐，傾成點呢？知情人士好有信心咁話：好好吖，大有可能達成協議呢。係咁就快啲搞掂佢啦，堂堂電盈，市值得二百幾億，好失禮啫。
傳真︰2623-9278
電郵︰