相信大家近日見到天皇巨星湯告魯斯（TomCruise）同萬人迷碧咸（DavidBeckham）一家喺馬德里睇波，先知原來佢哋咁鬼老友，而我羅拉重收到風話靚佬湯有可能搵碧咸客串佢嘅大製作《職業特工隊》第三集㖭。
原來碧咸喺美國已經相當出名，佢嘅足球巨星形象都幾深入民心，要喺電影客串絕對唔成問題，而且靚佬湯喺《職業特工隊》第三集身兼演員同監製，所以只要佢肯嘅話就一定冇問題。有內幕人士重話：「如果碧咸參演一定會增加英國同遠東區嘅觀眾，靚佬湯一向非常醒目，佢好清楚碧咸客串呢部戲有乜好處。」
唔知係咪老公碧咸有機會參演荷李活大製作嘅關係，Victoria近日去完洛杉磯宣傳時裝後，透露愛上咗呢個城市，希望碧咸退休之後一齊搬去定居。Victoria又堅稱佢同碧咸嘅婚姻完全冇問題，打風都打唔甩，重話佢哋喺床上面睇嘅唔係色情片，反而係驚嚇真人騷《誰敢來挑戰》（FearFactor）。
另外，碧咸前日喺倫敦同Beyonce及珍妮花洛庇絲（JenniferLopez）拍百事廣告，Victoria特別帶埋細仔羅密歐（Romeo）探班，唔知係咪想昅住老公有冇撩兩位靚女呢？