前日國米同華倫西亞互交白卷，臨完場阿祖安奴兜口兜臉打咗簡利拿一吓被趕出場，引發雙方球員混戰一輪。據講「阿祖」個動作太礙眼，停賽未必止於一場，攞正牌「放假」；佢停賽最愁並唔係國米（因為已經出咗線），而係華倫教練雲尼亞里。
數吓手指，國米前鋒阿祖安奴踢完七月美洲國家盃後一直紅到𠵱家，直到近一個禮拜狀態至見有少少滑落。佢孭重飛咁耐，前日俾人全場睇緊，被犯規後終於忍唔住還拖，終被逐離場。有評論就指佢夏天到𠵱家都冇點唞過，終於可以攞正牌休息，都係好事。
「阿祖」至少停一場，華倫教練雲尼亞里賽後就歎晒氣，事關佢講到明靠晒國米下場贏不來梅，自己隊波至有機會出線，家吓國米冇咗「阿祖」好難贏，唔怪得佢咁愁囉。不過咪話我話，其實國米出咗線，「阿祖」停賽與否下場都未必出，雲尼亞里，咪當係意大利自己友就實幫你至得㗎！
人氣急升嘅水晶宮前鋒安迪莊臣有望月中友賽西班牙時入選英格蘭；安迪莊臣日前向傳媒露口風，話佢因母親關係，有資格代表波蘭國家隊上陣，但𠵱家重未考慮踢哪支國家隊。我求大俠認為安迪莊臣認真醒目，唔講真係冇人知佢可代表波蘭，呢番說話當然畀艾歷臣啦！
早前公布李鐵會列入中港大戰名單，佢預計日前預備組對伯明翰時上陣，先嚟熱身，但最後冇踢，理由係領隊莫耶斯指李鐵傷咗八個月，唔想佢心急復出，浪費康復期嘅一番心血。我求大俠覺得莫耶斯唔係冇道理，話晒傷咗咁耐，不如等多一、兩星期觀察，但要踢國際賽就難啲！
愛爾蘭後衞夏迪今季轉投西甲升班馬利雲特後，即有可人表現，更助球隊打上第五位，認真唔講得笑！但係呢位前列斯球員，自從四月入選國家隊之後，近幾仗都未再被徵召；近日夏迪終開腔話好奇怪自己會突然落選，月中又有一輪國際賽，希望到時佢再獲垂青做番大國腳啦。
NBA噚日開鑼撞正美國嘅總統大選投票日，搞到三場揭幕大戰嘅入場人數都下跌，例如之前所有季前賽都爆滿嘅小馬，點知喺揭幕大戰竟然有成一千張飛賣唔出，激到小馬班主古賓直斥聯盟嘅安排不智，點會編排開鑼日同四年一度嘅總統投票日撞到正，今次古老闆確實鬧得有理！