隱形富豪「的士招」招友全，今日推出薄扶林碧瑤灣二十四伙拍賣，噚日公布開價，每呎三千七至六千一。最平嘅千五呎中層海景單位，開價七百二十萬；最貴係二千六呎一樓連近三千呎平台，要千六萬。
經紀話，開價頗為貼市，個別大約平五個巴仙，由於大部份連租約，略低於市價，亦係合理，如果業主心目中底價同開價差唔多，估計會有承接力。
老而彌堅嘅碧瑤灣，租金回報一般有四厘以上，適合長線投資者。
好似「的士招」收集呢批單位，個別即使喺「沙士」期間租出，以噚日嘅開價計，回報率都有三四厘。
小道消息話，唯一交吉賣嗰件三樓單位，叫價一千零三十萬，每呎三千八，「的士招」曾經自住，風水應該不俗，以現時租值計，回報隨時去到五厘，不失為筍盤。
盈大行政總裁李智康，成日話豪宅未來一兩年重有得升，要惜售物業，成日話唔賣住，又陸續賣緊嘅，除咗薄扶林貝沙灣及山頂歌賦山道二十八號之外，重包括私人物業。
李智康同老婆梁婉靜，九三年以六百五十五萬，聯名買入渣甸山衛信道低密度豪宅，啱啱以一千零八萬連租約賣出，單位逾千六呎，每呎六千一左右，收咗十年租，𠵱家賺三百五十幾萬，獲利相當唔錯。
不過，成績唔及大潭浪琴園不知名業主咁彪炳，佢去年中以近八百一十萬買入一座中層單位，短短一年半，件貨升值超過一倍，以逾千六萬轉手，每呎近九千二，勁賺八百二十幾萬。
財經雜誌《亞洲貨幣》由九一年起，每年都舉辦「管理最佳公司」選舉，請各地證券分析員與基金經理，就亞太區內公司嘅企業策略、管理人才、對小股東利益、營運效益、公司透明度以及整體表現等，評選出獲獎公司。
今年佢哋總結多年獲獎嘅公司，結果香港區累積得分最高嗰間，係新地。
新鴻基地產副主席郭炳聯話，佢哋會不斷提升企業管理水平，以及提高透明度。
衞生署旺角鴉蘭街兒童體能智力測驗中心塊地，最近有人向城規會提出，由政府、機構或社團用地，改為戊類住宅用途。
呢塊係政府地，唔夠三千呎，就算起樓，都係成支香雞咁，照計冇乜人會咁笨，做啲咁無謂嘅嘢。但當蘭西睇到黐住間中心嘅連勝大廈，發展商新鴻基地產已經獲准重建住宅，頓時恍然大悟。
皆因連勝塊地只得三千三呎，起樓同樣係香雞一支，價值唔大。但係如果兩塊地夾埋，就有六千幾呎，用九倍起，自然唔同晒。
所以蘭西估計，係新地提出呢個改劃申請，都應該十拿九穩啩。
電郵地址：
