黃伊汶（Emme）日前穿上婚紗和露背晚裝拍攝新歌MV，為求增添美感，工作人員特別將兩隻小鳥放在其肩膊上，但雀仔不停拍翼，令Emme嚇得尖叫，及後雀仔竟突然「瀨屎」，更濺到她的臉和膊頭上。
黃伊汶日前於銅鑼灣一間酒吧拍攝新歌《豁出》MV，穿上白色露肩婚紗和大露背晚裝示人，以配合MV的華麗氣氛。
Emme穿上婚紗拍攝時，工作人員特別購來兩隻雀仔放在她雙肩上，但雀仔因受驚而不斷拍翼掙扎，而Emme也被牠嚇到嗌破喉嚨，及後雀仔飛起時竟突然「瀨屎」，還濺到Emme的臉和肩膊上，化妝師見狀即為她清潔，Emme事後頻呼怕怕。
拍畢婚紗鏡頭後，Emme又換上紫色大露背晚裝長裙，玲瓏身段表露無遺。問Emme是否真空上陣？她即笑說：「我黐咗pad喺入面㗎，我黐慣㗎啦，稱冠呀！因為我跳舞要郁嚟郁去，所以成日都要黐。」
Emme表示入行至今穿過多次婚紗，故希望自己結婚時，能一反傳統穿黑色婚紗。問她不怕不吉利嗎？Emme說：「冇乜所謂，結婚都係儀式啫。」
她又笑言今次MV沒有男主角，擔任串星的雀仔卻嚇到她花容失色，她說：「好驚啲雀仔呀，佢啲腳係咁跳嚟跳去都幾恐怖，要拍好耐至聽話，今次MV冇男主角，係因為想啲焦點放喺啲衫度，有高貴嘅感覺。」
採訪、攝影：朱倬誼
