那英男友高峰同舊愛王納文嘅三歲仔仔元元，日前喺北京接受ＤＮＡ鑑定後，內地有消息傳出，話初步鑑定結果已經知道元元係高峰骨肉，雖然傳聞未經證實，但那英就話如果高峰要承擔責任，佢願意喺精神同經濟上幫高峰度過難關，認真有情有義！
噚日又有內地報道話高峰近日為鑑定事件而大受困擾，反而啱啱為高峰誕下一子嘅那英，就好淡定咁同啲朋友講，話自己已經睇開咗，只要個仔係高峰嘅，佢都會出錢去支持，因為那英𠵱家以家庭為首，最緊要自己同BB平安健康就心滿意足啦。
另外，有自稱同高峰王納文相熟嘅友人爆料，話當年王納文懷孕時，高峰曾經畀咗一大筆錢叫佢落咗個胎，點知王納文最後反口，所以呢位友人覺得王納文唔啱，若然有需要，佢樂意做證喎。
至於王納文就話高峰只係掛住同那英道歉，講到佢好似好唔檢點咁，佢話唔係想將高峰置諸死地，但點都要對方同佢公開道歉，換言之王納文要錢之餘又要面，睇吓那英點拆招啦！
張衞健女友張茜𠵱家人喺廣西拍緊劇集《歡樂桑田》，噚日有內地報道話張茜到𠵱家都未有結婚計劃，但佢同健仔嘅性格都有啲癲癲哋，隨時有閃電結婚嘅可能。張茜又話自己公私分明，以後喺工作上會同男友分開，佢重話最渴望扮演妓女喎。
著名華裔大提琴家馬友友前日由上海飛到台灣，繼續巡迴演奏會。
馬友友喺接受訪問時，用法文大談遺失大提琴嘅瘀事，又透露因為受女兒影響，𠵱家學會用ipod聽古典音樂，更驚歎小小嘅ipod竟可收錄六百首歌曲。
張信哲月底喺台灣搞演唱會，佢噚日喺台北舉行記者會，內地有傳佢已經有一個三歲大嘅私生子，阿哲大喊冤枉，佢話：「太烏龍了吧，我知道這消息時，人在瀋陽演出，是台灣的朋友打電話來求證的，我思想保守，絕對不可能先『有』後婚！」
黎姿入行以來緋聞多多，但佢到𠵱家都未有一個固定嘅男友，佢接受《him》雜誌訪問時，就講到擇偶條件，黎姿話鍾意一啲心地好、有內涵、有修養同有男人味嘅男人，呢種簡直係大部份女人心目中嘅白馬王子。
但係黎姿竟然話佢同靚仔好難通電，佢話：「要搵一個有錢又靚仔嘅嚟做男朋友真係唔難，但我都係鍾意啲腦筋轉得快又不失風度嘅男人。」
葉璇早前因為喉嚨發炎而入住養和醫院，佢休息咗幾日之後已經出院，重即刻復工拍《本草藥王》，點知經過兩日兩夜連續開工，加上又要為月中舉行嘅台慶綵排，搞到舊病復發，噚日朝早開開吓工，就喺化妝間暈低，由保安人員送佢入院，馮仁昭諗住打電話慰問吓佢，但就仍未聯絡到。講真早前葉璇成日病，已經有傳令到同劇嘅演員不滿，𠵱家佢又冧廠，難免會拖慢了拍攝進度。
劉德華嘅內地巡迴演唱會經已舉行完畢，點知近日網上有新聞話佢演出杭州尾站時，有工作人員喺台下叫觀眾唔好拍DV，話要趕觀眾離場時，態度粗暴重出手打人。當日馮仁昭都有去睇騷，事實上係嗰個觀眾咁啱係某個記者嘅親戚，完騷後，記者就帶埋親戚搵主辦單位，之後個記者重出手打人，然後又寫咗篇報道。華仔知道真相後覺得好無奈，但就信工作人員唔會打人。
