市場對美國大選結果好有信心，港股再升，恒指進帳88點。睇個樣，大選結果公布之後，無論邊位當選，全球股市都有機更上一層樓。
滙控C輪：滙控（005）升50仙，C輪如果跟足嘅話升5仙，當然通常只係升2-3仙就啱數。明年上半年到期嘅C輪中，4440升夠6仙，突晒章。2171升5仙，跟足。4642升4仙。4479與昨日推介嘅4445同升3仙。
4441則比較失敗，只升1仙，唔夠數，結果係啲數據正到痹。隻輪長壽，明年6月尾至夠鐘，輪價55仙，溢價得0.7%，槓桿率達23.4倍（有效13.2倍），引伸波幅又低至12%，畀0.7%賭8個月，抵到飛起。滙控收128.50元，距上次129元只差少少，隨時炒年底例旺，耐唔中三兩蚊跳一跳，4441既已平水咁滯，跟住耐唔中三兩毫（打少少折扣）飛一飛，好易賺到笑。
和黃C輪：和黃（013）收60.50元，升1格。和黃近期動作多多，不斷搞分拆，印度業務又有進展，大行出報告不斷睇好3G，股價向上多過向下。太A（019）強勁，對和黃亦有利。和黃C輪博得過，2157條件靚靚，睇吓走勢圖裏面啲數據就清楚。
太AC輪：太A（019）收57.50元，升1元，帶挈C輪9873打入風騷榜，排第2，升幅30%，有6.2球易手。隻輪數據靚，輪價27.5仙，溢價1.3%，槓桿率20.9倍（有效17.4倍），引伸波幅17%，但又近黃昏，本月25日最後買賣。
要玩太A嘅C輪，4506係正路對象，買賣易，吼正股回吐之時上車。
章盛