鍾意研究廣告嘅人士下個禮拜要注意喇，一向好肯揼本嘅中電，下個禮拜一又有新電視廣告出街！今次嘅新廣告除咗延續上年「燃點生命力量」主題外，食住香港經濟復甦個勢，將主題推廣至「燃點每個人力量，推動香港成長，始終同你一起向前」。
中電市場及客戶服務業務部總監潘瑞祥同八方講，今次廣告分別用咗三個「大城小事」，帶出中電與市民生活息息相關嘅訊息，並且想話畀市民聽，中電好希望可以繼續為市民服務咁話喎。佢笑笑口咁話，呢輯廣告同○八年後本港電力市場改革無關㖭！
八方問今年呢個廣告用咗幾多錢，潘瑞祥唔肯講，只肯話佢哋冇用到明星，廣告中所有配角係由中電員工義務客串。不過，據八方所知，中電呢輯廣告係由Saatchi&Saatchi操刀，斷估都唔會平得去邊囉。
（圖）中電新廣告有sell活力，有sell溫情，八方都幾期待。
傳真︰2623-9278
電郵︰