遠東發展（035）獲多間外資證券行睇起，將目標價再調高至4元樓上，照計唔關兄弟股遠東投資（036）同埋遠東酒店（037）事，但呢兩隻股一樣狂升，噚日分別勁升140％及90％，大市睇落有啲狂態。
尤其係遠東酒店，成交金額高達2億元，小初真係嚇到目瞪口呆，即刻諗起97年紅籌股熱潮，同埋早兩年科網股泡沫。
雖然家陣稍為與澳門或者賭業沾上多少關係的股份都有得炒。不過經紀陳話，咁唔代表其他股份冇人做嘢，好似將在下周一公布中期業績的修身堂（8200），近排股價就一路穩步上揚，噚日又升6.94％，收0.77元，成交算配合升勢，成交股數957萬股，金額723萬元。
經紀陳話，如無意外，修身堂業績應該好靚仔，加上早排金手指頻頻增持，所以股價愈見硬淨。另方面，市場有傳聞修身堂或者會借業績炒上，但股價升到咁上下時，就會批股集資，想搭順風車者，要留意呢個因素。
慕容小初