單數年嘅暑假通常都冇波打，搞到球迷要餓足成兩個幾月，先至有番波睇同有番波賭。但係，喺下年暑假就冇呢個問題出現，事關喺德國會舉行洲際國家盃。
呢個賽事係由○五年六月十五號踢到二十九號，為期十五日，參賽國家就有八個，包括A組嘅德國、澳洲、阿根廷同突尼西亞，以及B組嘅巴西、希臘、日本同埋墨西哥。不過，由於強國多數都唔重視呢個賽事，而且啲大牌球星經過漫長嘅球季之後亦想喺暑假唞唞；所以球迷咪預期到時會好似世界盃或者歐國盃咁星光熠熠，隨時只會係啲二線球員上場。
之但係，冇球星唔緊要，最重要就係有波打，因為有比賽，就即係有波賭。喺呢十五日期間有成十六場波，對於冇波打嘅暑假嚟講，簡直就係沙漠中嘅清泉。之後到咗七月尾、八月頭左右，歐洲啲聯賽亦會陸續開番；球迷喺冇波打嗰一個月，咪做好準備工夫，迎接○五/○六球季嘅來臨囉。
喺蘇格蘭國家隊捱咗兩年半嘅德國籍教頭福士，終於喺前日辭職。福士雖然曾經同德國捧走世界盃，但係由上任一刻開始就俾人批佢教唔掂蘇格蘭；事實亦證明一切，蘇格蘭嘅表現每況愈下，𠵱家重極有可能入唔到○六世盃決賽周。福士走對兩方都好，佢有望執到五十萬鎊分手費，蘇格蘭亦可望喺新領隊帶領下有機會翻生。
輾轉跌至英格蘭甲組嘅巴拉福特，因唔滿意球證喺比賽中笑佢哋水皮，於是向英足總同英聯賽會告狀，討回公道。話說球證羅斯喺上周六巴拉福特以○比四輸畀盧頓嘅聯賽，公然喺比賽中笑前者係魚腩；當巴隊前鋒雲達斯上前同佢理論，更俾佢逐出場。球證應該保持中立態度，如果羅斯因為咁而影響佢吹雞生涯，都係佢自己攞嚟。
噚日NBA有唔少年輕球星紛紛同所屬球隊續約，好似馬刺嘅柏加、拓荒者嘅蘭度夫同火箭嘅麥基迪等都如願以償，簽得高薪合約。點知木狼嘅史比維爾又話要木狼同佢續約，重唔想減人工。講真，史生上年表現雖然叫稱職，之但係已經成三十四歲，今年收緊一千四百幾萬美金一年；要好似班後生咁高薪續約，大想頭啲啩？