拉登喺電視螢幕亮相，並冇拉低美股，美股周一升啲，加埋油價又跌，港股氣勢盡露。C輪揸家一朝富貴，升幅超過20%嘅C輪，有半百件，其中升幅超過30%都有19件。
滙控C輪：恒指升214點，滙控（005）升1.5元。滙控升幅叫做細過恒指升幅，但好幾隻C輪因為槓桿率夠爆，標準輪中9894同4507升幅分別高達47%同37%，打入10大風騷榜。
滙控繼續睇好，同文何車兄周一大製作，話根據歷史，每年最後兩個月港股例旺，滙控更旺，滙控直迫新高，食大茶飯，滙控C輪係理想對象。上周五推介嘅4445，上升空間非常大，隻輪明年6月到期，輪價47仙，溢價只係2.1%，槓桿率則高達27.2%（有效13.1倍），而引伸波幅則只有14.1%。滙控年底前見140元，唔係冇可能，見呢個價，就算平水，隻輪值1.40元，足足有兩倍潛在升幅。另一隻熱門C輪4441，炒慣滙控C輪者亦無人不識，數據又係靚到絕，見走勢圖裏便嘅資料。
中銀C輪：年尾炒銀行股，唔會少咗中銀（2388）。中銀昨日收14.35元，升0.20元，C輪不妨揀隻炒炒，最佳對象係9169。隻輪明年2月到期，輪價20.2仙，溢價得0.3%，槓桿率7.1倍（有效6.8倍），槓桿率只係16%。中銀見番年初16元高位，隻輪見37仙。
恒指C輪：恒指咁升法，恒指C輪9911自然威猛，升25%。短炒恒指C輪，可以諗吓冇升咁多嘅4442。隻輪明年3月到期，輪價17.4仙，溢價3.3%，槓桿率17.8倍（有效10.1倍），引伸波幅19.7%。
章盛