香港樓盤一日賣幾百伙，已經好哄動，但喺內地就愈嚟愈平常。上個禮拜六開賣嘅深圳京基‧御景華城，一日售出逾千二伙，創單日銷售紀錄，套現四億（人民幣，下同），呎價七百九十。當中有個港客，大手買入百五件。
呢個港客，喺深圳有公司，之前都有買過深圳樓，但今次就最重手，涉資五千萬，估計部份會做員工宿舍，其餘出租，相信可以攞到十厘八厘回報。
其他大手吸納嘅，唔少買十幾個到三四十個。淨係呢啲大手，夾埋都買咗成五百幾件。
個盤共六座近三千六伙，規模喺嗰區少有，單位由三百至九百呎，每伙十八萬至八十零萬，買家中，港客佔三四成。深圳市京基地產，計劃月中喺本港發售五百個預留單位。
財政司司長唐英年，已經開始就下個財政年度盤數作準備，日前喺立法會建議檢討本港稅制，酒稅係其中一環。
噚日長實執行董事趙國雄發表意見話，亞洲經濟復甦，香港可以從多方面考慮減低稅項。
佢強調，減低酒稅有助經濟復甦，本港大可以發展成為洋酒中心，分分鐘為本港經濟闖出新路向。
講起酒稅，蘭西記得，財爺有個酒牌，又出名鍾意飲紅酒，老趙咁嘅建議，睇嚟明益唐司長。一旦降低酒稅，唐司長可以大手入多啲，到時可能要諗嘅，係使唔使買過幢大屋，成間做晒酒窖。
大酒店標售尖沙嘴九龍酒店，經過首輪爭奪，現已進入第二輪決賽。據悉，只有五個財團，獲邀本月十九日前入標，龍頭發展商新地，證實入選。
城中唔少發展商，都對呢幢酒店有興趣，例如恒地、信和、華人置業同遠東發展等，都曾經出價。據悉，個別出價高達十六億，都被拒諸門外。
市場人士估計，今次底價可能高達十八億，平均每間房大約二百五十萬。
位於彌敦道同中間道交界嘅九龍酒店，屬於四星級，有七百三十六間房，四層地庫商場大約四萬呎，總樓面三十六萬呎，八六年落成，喺正地鐵及九鐵尖東新站出口，人流絕對有保證，難怪業主心雄。
新盤貨尾擺得太耐，好容易遺忘，好似信和大埔寶馬山花園及元朗雍翠豪園，真係唔講都唔記得，原來重有單位賣。為咗提醒買家，信和將呢兩個盤加埋屯門海典軒及馬鞍山海典灣，合共二十五伙，委託美記做獨家。
信和營業部總經理韓家輝話，上水金錢村項目就嚟賣，所以想先清售貨尾，重特別為呢批單位，加入特長九十天成交期付款法，買家先付一成首期，其他九十日後畀，名額八個。
四個盤嘅呎價，最平由雍翠豪園二千一起，最貴係海典灣特色單位，要六千蚊。
金管局啱啱公布最新負資產數字，由去年高峯期超過十萬宗，回落至今年第三季兩萬零宗。中原研究部即時作出呼應，公布名為正資產嘅數字。所謂正資產，係指九五年起買入嘅物業，現值比按揭負債高，就稱之為正資產。
過去幾個月，樓價與成交都向上，正資產自然愈嚟愈多，數字對反映樓市作用不大。不過，中原黃良昇話，負資產對樓市，甚至對整體經濟嘅影響力大減，日後只會統計正資產宗數。
樓市向好，梗係冇乜人會再關心負資產問題啦。
寫字樓熱賣，令唔少早輪賣唔出嘅都「鹹魚翻生」，好似中信嘉華五月暗盤標售而未成功嘅上環嘉華銀行中心，最近成為投資市場熱點之一。據悉，業主索價三億二，經紀都落力搵客，唔排除成為本月大手成交之一。
呢幢二十三層高寫字樓，樓面七萬三呎，中信嘉華打算售後租回，保證首五年每月租金一百二十五萬，呎租十七蚊，若以三億二賣出，每呎四千四，回報四厘七。
不過，有投資者認為，目前上環乙級寫字樓呎租大約十蚊頭，實際回報唔算吸引。
