噚日有周刊大字標題話發嫂有喜，馮仁昭即刻打電話畀發哥兩公婆求證，發哥話：「如果我老婆有咗，一定告知天下，呢啲咁開心嘅事，冇乜好隱瞞，梗係要第一時間同大家分享喇。我都要多謝本周刊提醒，聽日都要帶我老婆去睇吓婦科，如果我老婆有咗幾個月，我都唔知，本周刊先知，我又真係懵得好淒涼。」
發嫂因為有少少肚腩，所以俾人以為佢大肚，發嫂尋日喺電話度講：「其實我同本雜誌話冇大肚，但佢哋一廂情願係都話有，我都冇法子，呢個世代，我覺得唔係咁適合生細路，所以我同發仔都冇諗住要BB。」
馮仁昭問發嫂，點解發哥家姐周聰玲會同周刊講到係事實咁，發嫂話：「呢啲嘢係咪玲姐講我都有疑問，但係唔係佢講都好，我諗有冇BB，冇人清楚得過我兩公婆，大肚呢啲事冇得呃人，時間可以證明一切。」
林心如轉眼出道已十年，佢下星期會放假三個月，計劃去紐約遊學。佢用國語話：「高中開始，出國念書一直是我心目中的夢想，可是後來我踏入演藝圈，夢想便一直無法實現。」林心如表示忙完朱延平嘅電影《一石二鳥》後，又忙於拍衞生巾廣告，佢話：「連續十年不斷地演繹不同人生，讓我有種被『掏空』的感覺，決定藉出國遊學來充實自己。」
田亮前日由重慶去到西安出席活動，被問到佢帶郭晶晶返重慶老家傳聞時，田亮話：「那都是小道消息。」雖然佢唔否認亦唔承認，但就同班記者講：「郭晶晶不是我的女朋友。」至於早排佢自爆有心上人呢件事，田亮笑住咁話：「媒體愈傳愈邪，現在我不能告訴大家。」
李綺虹喺九月初榮升做媽咪，上星期佢同BB返咗嚟香港，一副有仔萬事足咁款。日前李綺虹就帶埋BB幫《娛樂大搜查》做咗個訪問，講到BB個中文名原來都有啲趣事，皆因BB嘅中文名叫李志德，但佢爸爸又係外國人，當爺爺問到BB嘅中文名時，烏龍爸爸居然講咗做「LazyDuck」，即係懶鴨仔。
鄭伊健同女友梁詠琪（GiGi）噚日都喺機場現身，但一個離港、一個返港，其間相隔幾個鐘，所以呢對情侶無緣喺機場相逢。不過伊健為求見女友，喺機場急急趕返屋企，GiGi話：「我哋喺屋企門口say咗聲hi。」另外，伊健日前以SHESIDO代言人身份到北京出席「歐珀萊十周年晚會」，重同奧運金牌游泳選手羅雪娟見面㖭。
歐陽震華（Bobby）前晚到電台接受訪問，提到鄭少秋話睇好佢奪無綫台慶「我最喜愛的男主角」大獎，Bobby坦言十分有信心，佢話：「好多謝秋官，我知自己領先，好高票，今年我有《陀槍師姐》同《青出於藍》兩齣劇，我自己鍾意《青出於藍》裏面嘅角色多啲，《陀槍》拍咗四集，冇晒新鮮感。」
