正當大家以為澳門賭業概念股到頂之際，點知噚日再次狂升，真係唔到你唔服！
噚日咁多隻澳門概念股中，以老虎仔隻遠東發展（035）最為矚目，單日勁升21.35％，收2.70元，成交股數1.63億股，金額高達4.14億元，唔使問阿貴，又係近年新高。
經紀黃話，遠展係繼新濠國際（200）之後，大行向芬佬同埋機構投資者重點推介的股票，最大賣點當然係同金沙阿媽威尼斯人合作的澳門度假村項目，重話合約即將在短期內搞掂。
查實遠展除咗澳門度假村項目外，近期出售物業以幢計，賺落唔少錢，所以唔似其他賭業概念股咁虛無飄渺，升得亦有道理。
反而一直勁吹話中石化（386）入股的中國燃氣（384），噚日計劃落實復牌，但表現就實在令人失望，竟然好消息出貨，先升至1.10元高位，然後一路沽落嚟，以接近全日最低位0.92元收市。雖然傳統智慧亦教人趁好消息出貨，但走勢咁肉酸，就認真少見。
慕容小初