四叔李兆基旗下間恒基發展，喺千禧年時分拆恒基數碼喺創業板上市，眨吓眼五年，當年四叔明益股東，每持有兩百股恒發嘅股東，就送一股恒基數碼，當時恒基數碼每股定價係一元二角五仙。不過，隻股上市至今一直潛水不特止，五年來一直蝕錢，派息就唔使旨意。
噚日恒基數碼舉行第五屆股東周年大會，有位小股東就向公司行政總裁穆得志大興問罪之師，又問管理層公司既然有成七億現金，點解唔派息？穆得志話，公司正朝着賺錢目標進發。咁即係幾時有息派呢？「派息嘅大前提係有盈利。」咁幾時有錢賺呢？「未能估計。」
既然管理層未能為股東賺錢，呢位小股東於是行使佢僅有嘅權力，否決畀每位董事○四年度兩萬元嘅董事袍金，不過得呢個股東反對，所以議案最終一樣通過。
傳真︰2623-9278
電郵︰