雖然人氣連續劇《色慾都市》第六輯已經喺今年二月全部播完，結局係講由莎拉謝茜嘉柏嘉（SarahJessicaParker）飾演嘅女主角Carrie終於同基斯羅夫（ChrisNoth）飾演嘅舊情人Mr.Big復合，而當Carrie提出同巴雷什尼科夫（MikhailBaryshnikov）扮演嘅俄籍男友分手時，重俾對方摑咗一巴。但係原來除咗呢個結局之外，製作公司喺之前特別拍咗三個從未曝光嘅結局，重會收錄喺遲啲推出嘅特別版DVD入面㖭。
當時製作人員為咗唔想洩露結局嘅劇情，特別拍咗另外三個結局，但係就一直冇公開，今次推出嘅特別版DVD就會一次過畀大家睇晒四個結局同其他之前刪剪咗嘅片段，實行畀色慾fans過足癮。
第一個未曝光結局就係話Mr.Big去咗巴黎搵Carrie，但係佢同Carrie講唔能夠同佢一齊；第二個結局就係話Carrie同其他慾女講，叫佢哋喺佢同俄籍男友結婚時做伴娘；第三個結局就同第六輯原本嘅結局差唔多，都係話Mr.Big願意返紐約同Carrie喺埋一齊。
另外，飾演蕩女Samantha嘅甘卡拉圖（KimCattrall）日前就同蘇珊莎朗頓（SusanSarandon）一齊，出席紐約一個頒獎禮。