樓市透明度提高，作價變動幅度收窄，但間中仍會出現超高或超低價，屯門邁亞美海灣就有一宗勁平成交，比市價足足低兩成。
呢個四座低層D，近七百呎，一百萬有找，僅九十九萬五千，每呎一千四百三。蘭西翻查資料，發現個價係今年第二低，對上一宗喺一月，五座B每呎一千三百九。呢個低層D一直收租，最近約滿放售，業主見單位質素與裝修都麻麻，估計買家要貼錢翻新，所以肯平啲賣。而且佢喺九龍搵到心水住宅，都需要套現。
買家見呢個係向海最大兩房戶，業主又將開價由百二萬降低，於是嘗試還價。最初還九十萬，估唔第二口價九十九萬五，業主已經肯賣。
趙世曾近排頻頻露面，介紹卓能山頂施勳道30號C獨立屋紫薇居，噚日親自帶傳媒參觀。三層高獨立屋連戶外泳池成五千五百呎。
講到室內裝潢，趙世曾話，相對薄扶林趙苑，紫薇居較有古典味，因為間屋放置好多古玩同名畫，例如明朝掛畫。屋內重有幅係唐伯虎真迹。部份擺設，係趙世曾媽咪親自揀選，收藏超過二十年。不過買家要留意，啲古玩同名畫，唔係隨屋附送。
負責招標嘅中原何兆棠話，現有二、三十宗查詢，包括東南亞基金及內地資金。至於趙苑A1洋房，下周招標。
樓市暢旺，十月份共有七千一百五十三宗二手住宅買賣註冊，比九月增加兩成，係近六個月新高。
註冊量最多嘅二十個屋苑，有四個超過一百宗。最多係荔枝角美孚新邨嘅一百二十九宗；美孚頭十個月註冊量重超過一千宗，係九七年以來第一次。增幅最大係鰂魚涌太古城（圖四），增加一點四倍，共一百零一宗，其餘為沙田第一城及天水圍嘉湖山莊。十月整體樓宇買賣註冊量，係一萬零八百四十二宗，比九月增加近兩成一，連續第二個月增加。
美記劉嘉輝話，十月因為賣地理想，二手住宅提高叫價，令買賣減少，尚幸一手盤相繼開賣，因此預料本月註冊可以多過一萬宗。
上個月有賣地刺激，又有多個新盤推出，各大代理行噚日爭住報捷。中記營業額直迫二億，淨係住宅都收億六，打破二月紀錄，兼且創九七以後單月新高，後勤員工再獲發五百蚊利是。
港置都話，十月營業額倍增，係九七年十月以嚟新高，佢哋都會向後勤員工派發最高三千蚊獎金。
至於利記，上個月營業額就有四千八百萬，比九月多兩成，執行董事廖偉強話，以目前嘅生意額睇，年尾後勤有機會出到五個月花紅。另外，美記上個月有六十六間分行營業額過百萬。
今年最矚目嘅分層豪宅尖沙嘴凱旋門，千呼萬喚，終於有聲氣開賣，新地展開前期軟銷，頭炮介紹摩天會所（SkyClub），點做至最貼題呢？
答案係用舞蹈表達，今個禮拜五，喺中環國金中心商場，舉辦摩天舞蹈表演，重話有空中華爾滋㖭。
新地代理執行董事雷霆年頭話過，凱旋門頂層，呎價要過兩萬，實行打破九龍豪宅紀錄，𠵱家睇嚟，肯定超標。
香港置業即時幫手造勢，助理董事葉展均話，佢哋收到逾五百個客查詢。
電郵地址：
