個市觀望氣氛濃厚，總成交95.3億，只係得番前市1半多啲。恒指波幅唔大，大家喺度等美國大選結果同拉登有冇行動。過多兩日，美國新總統如果順利誕生，個市會比較明朗化。地產股昨日硬淨，下一回合估計會有作為。
長實C輪：地產股如果有勢，唔會冇長實份（001）。熱門C輪2249上周五跌4仙，昨日彈番1仙，收35仙，短炒吼呢隻。2249明年2月到期，溢價5.8%，槓桿率18.5倍（有效9.6倍），引伸波幅25.4%。呢件上落快，入市位攞得準嘅話，炒即市三茶兩飯已經有着落。
長實C輪2209數據靚，明年1月到期，輪價55仙，溢價2.5%，槓桿率11.8倍（有效8.4倍），引伸波幅25.2%。呢件交投稍遜，買賣有時唔係咁貼位。用嚟揸，買2209，買嚟炒，揀2249。
新地C輪：新地（016）升50仙，熱門C輪2252則跌0.5仙，收28仙，短炒新地C輪，揀呢隻。2252明年2月夠鐘，溢價5.9%，槓桿率25.9倍（有效11.1倍），引伸波幅24.8%。
新地C輪9391數據靚，年底到期，輪價77仙，溢價負1.2%，槓桿率9.4倍（有效8.9倍），引伸波幅20.9%，交投唔多係缺點。
國壽C輪：國壽（2628）上周五逆市升咗之後，昨日企定喺5.15元，C輪2143則跌7.3%，收24.1仙，跌後值博率上升，短炒有得諗。隻輪明年1月到期，溢價5.7%，槓桿率21.4倍（有效10.7倍），引伸波幅30.8%。
章盛