有日搭巴士睇路訊通廣告，見到黃毓民（圖）坐喺佢間「毓民牛肉麵」舖頭內講贊成禁煙。毓民本來係煙鏟一名，後來佢信主，跟住戒埋煙，政府搵到佢現身說法宣傳反吸煙運動，的確有腦。
個官有腦，但個部門就冇乜時事觸覺，竟然到現在都畀條宣傳片出街。係人都知毓民九龍城呢檔私房牛肉麵，十月已經轉咗手，由李純恩頂咗嚟做，連招牌都改埋做「大婆牛肉麵」。
立法會最近辯論食肆禁煙，張宇人代表食肆利益反對全面施禁，被人圍攻。如果八方係張宇人，睇到政府呢條宣傳片，實笑到肚痛，大可振振有詞：嗱，贊成禁煙吖，咪收檔囉，招牌拆埋唔止，重要走去台灣避難㖭……邊間舖頭禁煙，下場點，有辦你睇啦。
傳真︰2623-9278
電郵︰