早排親口承認隆胸嘅名模樂基兒，噚日去咗金鐘太古廣場，出席EsteeLauder最新嘅秋妝示範，佢坐喺櫥窗內作示範，即刻吸引大批傳媒採訪同市民圍觀。
記者就問樂基兒承認隆胸之後，工作量同埋自信心有冇大增？同埋係咪要好大勇氣先敢承認隆胸？佢就大發嬌嗔咁話：「已經係舊新聞啦！咁大個topic我都講咗啦，我承認咗已經好nice，唔需要理人哋點諗點講，有冇增加工作量你問我經理人啦，我幾時都對自己嘅身材充滿信心。」
再問到樂基兒化妝嘅心得，佢就話：「唔係工作嘅時侯，我只係搽睫毛同唇彩，有時都會向啲化妝師攞貼士嘅，不過我嘴唇厚，所以唔可以搽太紅嘅顏色。」
馮仁昭好羨慕樂基兒，因為無論佢着得多定少，身上一定有樣嘢強過人。
荷李活電影《藝伎回憶錄》先後傳出多位知名女星爭住演，章子怡已經喺美國開工，最近原麗淇都落實會參演，扮演一名命途坎坷嘅藝伎。原麗淇喺美國接受教育，滿口流利英語，相信佢唔會好似章子怡咁要惡補英文先可以同外國人溝通。
王家衞早幾日去咗倫敦電影節宣傳《2046》，佢提到由梁朝偉主演嘅《葉問傳》應該喺○六年先開拍，重強調呢部係動作片，可以視為香港版《搏擊會》。另外妮歌潔曼（NicoleKidman）會喺王家衞套新片度扮演一名自稱來自上海嘅神秘女子。
台灣藝人張清芳被踢爆同男友宋學仁上個月嘅二十三號喺香港秘密註冊結婚，張清芳前晚就好低調咁返咗台灣，佢用國語話：「謝謝大家的關心，此時我不便對外發言，還是感謝大家的祝福。」根據馮仁昭估計，佢都係尊重男方，唔想佢受騷擾啫。
無綫上星期收視全線下跌，亞視就全線微升，由鄭少秋主演嘅台慶劇《楚漢驕雄》氣勢似乎麻麻哋，只係得二十七點收視；而《爭分奪秒》嘅拍攝手法同劇情觀眾似乎重未可以接受，所以冇乜捧場客，只得二十六點收視。唯一可以保持到收視嘅係《繼續無敵獎門人》，星期日播都有三十二點。
李莉莉噚日去新城接受訪問，提到佢老公被起訴，有傳佢會復出幫手賺錢。李莉莉就否認有咁嘅事，記者提議佢學章小蕙拍性感戲，佢話：「佢咁好身材，我好羨慕，留畀靚身材嘅人拍啦！我𠵱家想唱慢歌，但同我以前儍大姐嘅形象唔係咁襯。」
