電影《中央車站》嘅巴西導演禾特沙拉斯（WalterSalles），早前搵咗《狗男女的愛》兼《性．教．慾》男主角艾爾加西亞般奴（GaelGarciaBernal）喺新片《哲古華拉少年日記》扮演少年版哲古華拉，呢套後日喺本地上映嘅話題電影，重俾美國報章《今日美國報》話好有機會入圍嚟緊一屆奧斯卡最佳電影提名㖭。
《哲古華拉少年日記》描寫做革命家前、重係醫科大學生嘅哲古華拉，同一位好友揸咗部殘舊嘅電單車橫越南美洲嘅經歷，路程超過一萬三千公里。導演以平實嘅手法描寫哲古華拉同佢老友走過智利、秘魯、哥倫比亞同委內瑞拉等地，眼前所見都係貧苦大眾俾強權剝削嘅慘況、同病人嘅貧苦生活。呢段旅程改變咗哲古華拉嘅人生觀，佢決定唔做醫生，立志成為「醫治人民心靈」嘅革命家。
呢套片除咗係一部傳記式電影外，又係一部公路電影，亦包含友情同人性嘅元素。套片重好似另一部巴西片《無主之城》一樣，受到日本時裝設計師垂青玩crossover。最近日本時裝品牌Devilock就推出咗限量一百件嘅《哲》片Ｔ恤，勢必成為炒貨。