最近小初屋企想換電視機，正在盤算緊買Plasma定係LCD電視機好，於是走去電器舖格價，發現家陣電視機原來平咗好多，唔知對冠捷科技（903）同埋唯冠國際（334）有冇影響呢？
經紀黃話，有分析員見過冠捷高層，話佢哋雖然有生產LCD電視機，但數量並唔係大得咁交關，所以受產品價格下調的影響唔會好大，現時冠捷業務仍以出口顯示器為主，成本重控制得好好，所以冠捷股價一直企硬，並唔係冇道理。
冠捷噚日微升1.6％，收4.75元，成交股數118.8萬股，563萬元。
另外，於上周股價勁升至1.01元停牌的中國燃氣（384），傳聞話搞配股，但小初問勻全世界都搵唔到係邊間證券行幫佢搞。經紀陳話，路邊社消息話中國燃氣批股唔係批畀街外人，而係單一投資者，而呢位策略投資者，江湖傳聞係中石化（386）阿媽嘅關連公司，入股數量有一成咁多，市場重傳中國燃氣會在今日復牌。
慕容小初