美國總統大選今日投票。恐怖巨子拉登，公然恐嚇美國人民：邊個州選舉人由共和黨贏出，將來就對這個州發出恐襲！
咁即是粗暴干預美國內政，干預美國人投票意向！美國選民若果俾佢拋窒，明日大選結果公布，明日之後，美國重使領導全球？
恐嚇選民，企圖左右投票意向，呢一招，中國都用過。一九九五年台灣總統歷史上第一次直選，中國發動東海演習，警告若然台灣人選出李登輝，就即時開仗！
二○○○年，輪到李登輝任滿落台，中國總理朱鎔基警告：若然台灣人選出陳水扁，咁即是話選擇台獨，中國一定會用鮮血及生命捍衞領土統一咁講！
結果係點？就係李登輝當選，阿扁連任。若然美國選民俾拉登嚇一嚇就即時選晒克里，咁咪美國公民嘅膽量、意志、質素，咪連二千三百萬台灣人都不如？呢樣係冇可能嘅。既然拉登出面企圖分化，咁全美國人民，更應團結一致，五十大州，州州選晒布殊，想郁手，放馬過來！
拉登用化武、核彈、細菌炸藥公然勒索，叫唔准選布殊，美國佬就乖乖唔選，此例一開，二○○八年香港立法會選舉，有勢力人士只要點名，話除非全港選民唔選劉慧卿、李柱銘、長毛、大班入立法會，一定要選蔡素玉、陳鑑林，否則即時斷東江水、斷豬肉、斷米，並大亞灣核電廠停產（老實講呢一樣又唔係壞事喎），咁呢個世界重有王法？
故此，為免致其他心智唔係咁成熟嘅國家有樣學樣，立下惡例，為維持人類基本紀律及尊嚴，美國選民都要立志，本來諗住選克里嘅，今日即時轉軚，全部投晒布殊。如果唔係，不如齊齊邀請拉登做美國總統！
拉登入主白宮？美國佬肯，阿胡溫都唔肯過你喇！兼且選咗有「美國唐唐」之稱嘅克里，唔通拉登就會即時繳械？咁諗就太過「simple」同「那衣褲」咯，美國選民唔係個個都好似「K寶」女記者張寶華吖嘛？
不過，拉登仇恨布殊到咁瘋狂嘅程度，香港人見到又係會有少少驚。咦，唔講唔知，阿董自稱係同布殊家族好有交情，呢一樣就全個珠江三角洲都知。萬一重慶大廈方面將呢項情報彈畀拉登，咁香港喺未來三年咪隨時會遭到恐襲浩劫？
八方在此向拉登呼籲：唔關香港人事呀，港人都喝令阿董落台嘅啦，不過大陸政府唔畀咋！「布殊老友」做咗特首，香港人都唔想㗎，請拉登大哥放過香港，萬一真係要郁手，都要借祖國衞星導航瞄準目標喎。
傳真︰2623-9278
電郵︰