陳奕迅（Eason）加盟環球系唱片公司已成定案，唱片公司高層日前開會決定安排Eason入同系的新藝寶做一哥，既可為新藝寶省招牌，又可與同門的李克勤和許志安三分天下。
陳奕迅加盟環球系唱片公司已塵埃落定，由於與環球同系的唱片公司尚有正東、上華及新藝寶，本來Eason是加入正東，與許志安同門。但日前唱片公司開會，決定將近年主力發行出碟而未有簽歌手的新藝寶重組，安排Eason入新藝寶做一哥，與安仔及環球的李克勤「三分天下」，新藝寶上月亦已跟雷有暉簽約，其新碟將於下月推出。
為隆重其事，新藝寶定於本周五下午一時於半島酒店舉行記者會公布詳情。昨日記者致電正東高層黃劍濤，問到Eason被分配到新藝寶是否刻意與克勤及安仔分開門戶？他在電話中說：「冇關係，排得好係冇問題㗎，我哋係想重新發展新藝寶啫。」
此外，楊千嬅、吳浩康前晚到無綫將軍澳電視廣播城錄影《勁歌金曲》，對於Eason即將簽約環球系唱片公司，千嬅大表贊同說：「咁我就真係要恭喜佢啦，係人都知Eason鍾意唱歌，我都想佢快啲再出碟。」
千嬅更透露早前曾與Eason傾談，她說：「佢BB出世前我見過佢，提到當年大家喺華星都遇到轉會問題，佢都講過想快啲再出番碟。」
對於有報道提及Eason加盟後，許志安會受到威脅，千嬅說：「𠵱家都唔興呢啲嘢啦，大家寫吓啫，當年我同陳慧琳一齊喺正東都有好多歌手，得與失好睇個人表現同際遇。我都好想同Eason合作，最好就搵埋梁漢文同我哋兩個，組成亞洲三寶。」
對於近日名模樂基兒承認隆胸的熱門話題，千嬅笑說：「我自己睇慣咗咁嘅樣啦，整大咗怕阿媽唔認得呀，同埋我覺得女人心胸嘅容量都好重要。」
採訪：李珮洳
攝影：仇志德
