NBA聽日開鑼喇！今季本港嘅籃球迷特別興奮，因為等咗咁多年今年終於可以每日都睇到NBA直播比賽喇！大家都知有線電視由聽日起，增開一個NBATV嘅收費台，每日直播一場比賽，喺頭五日更增至兩場，而且每個禮拜重安排三場喺有線體育台播益埋基本用戶㖭！
據聞，今年過咗檔至now寬頻嘅ESPN立即加碼回擊，直播場數由上季每個禮拜兩場（ESPN加STARSports）增至今季嘅三場，以後ESPN將喺星期六連播兩場直播比賽。
如果球迷裝晒有線同now，一個禮拜就可以睇成十場NBA比賽，認真過足睇波癮。今次有線同ESPN爭播NBA，最大得益嘅肯定係廣大嘅NBA擁躉咯！
早輪我求大俠講過，英超水晶宮嘅前鋒安迪莊臣好勁，估唔到利物浦領隊賓尼迪斯同我英雄所見略同。喺「紅軍」前鋒施斯斷腳要長唞之後，英傳媒就話水晶宮嘅安迪莊臣已成為賓尼迪斯喺一月買人時嘅目標，重話利物浦不惜用銀彈戰術，一於要水晶宮放人為止。
今季英超有雙頓表現令人刮目相看，咪就係目前排三、四位嘅愛華頓同保頓囉！保頓最近重傳出好消息，就係佢哋嘅中場路倫答應同球會續約五年，而首席射手柏達臣就續約三年。保頓領隊艾拿迪斯同啲有名氣嘅老將就簽一年短約，實用又當打嘅就簽長約，好嘢！
美國總統大選今日展開，喬治布殊和克里誰勝誰負不但牽動美國人，就連NBA外援都非常關心。如小馬嘅德國前鋒奴域斯基就抽空睇兩候選人嘅辯論節目；佢更指美國「非此即彼」，只有民主同共和兩黨供選擇，唔似德國有多至七到八個候選人，更易搵到合心水選擇。
國足大軍初步名單已落實，受傷多時嘅李鐵歸隊，而國內傳媒就為中港大戰做咗調查，問國足成員對出線意見，十九人之中有十五人話可以出線；但得兩個有信心可達阿里漢目標大勝六球，大多數認為只能淨勝三至五球。咁多人有信心贏三至五球，我求大俠真係有啲懷疑得唔得？