美股上周五收市冇事，但收市後拉登喺電視螢幕上露面，對股市或者會有啲心理影響。港股如果因此而散一二百點，則可考慮低位吸納藍籌C輪，博美國明日大選順利完成，個市彈番上去。
中石油C輪：油價近日回落，中石油（857）股價亦回軟，現價4.075元，同上月初高位4.325元比較調整咗0.25元，吼住喺4元邊邊，撈C輪短炒。
中石油C輪主角係2124，年底到期，輪價26.5仙，溢價4.7%，槓桿率15.4倍（有效9倍），引伸波幅33.8%。
較短期嘅9343，數據亦靚靚，下月中到期，輪價89仙，溢價負0.1%，槓桿率4.6倍（有效亦係），引伸波幅不適用。
中石化C輪：中石化（386）上周五宣布，今年第3季較去年同季多賺62%，公司又預期第4季內地成品油同化工產品需求會持續增加。
中石化早前最高3.325元，𠵱家2.95元，已調整11%，估計反彈有機。
搵中石化C輪炒，最靚數據嘅係2240，明年4月到期，輪價32仙，溢價8.5%，槓桿率9.2倍（有效5.4倍），引伸波幅35.2%，不過交投嫌唔得活躍。其次風險與回報相對較大嘅係2215，明年2月到期，輪價12.6仙，溢價12.7%，槓桿率23.4倍（有效8.6倍），引伸波幅36.2%。
中海油C輪：中海油（883）股價波動大過其他同類股，芬佬推上㩒低，低位博C輪，對象係4563，夠長壽，明年9月至到期。
章盛