中國歷史文化源遠流長，旅遊推介常以「給我一日時間，還你千年奇跡」招徠，長駐內地出任滙豐中國業務總裁嘅葉迪奇，公餘最愛睇古迹。八方早前出席該行蘇州分行開幕儀式見到佢，佢話「前一晚食飯嘅園林餐館，有200多年歷史，酒店對面個塔，又有300幾年。有次去青島大連公幹，睇到日本入侵同中俄打仗嘅珍貴歷史……作為中國人，唔親身嚟到真係感受唔到」。
駐紮上海兩年，葉迪奇話生活起居都已習慣，「去到重慶就食麻辣，到大連就食水產，喺廣州連野味都試。」唯一美中不足嘅，佢謙稱自己嘅普通話唔及格，只得三十分，不過身邊嘅滙豐中國公共事務總經理張丹丹就讚葉老總「煲冬瓜」進步不少，應該有八十五分。
本身係香港飛行服務隊隊員嘅葉迪奇話，落戶上海後都少咗揸飛機，猶幸平均每個月都會返港公幹，順道揸吓飛機，保住個牌。
傳真︰2623-9278
電郵︰