乞兒都可以問銀行借到錢買樓，但當紅明星就唔得，係咪覺得冇可能呢？但呢啲係真人真事。
中原老闆施永青上個禮拜六接受有線電視訪問，佢話，當年幫個師奶買家辦理申請按揭手續，先知師奶老公，原來就係佢分行門口個乞兒，施老闆覺得，銀行一定唔批按揭，點知個乞兒叫佢打電話畀某銀行嘅負責人就得嘞，最後果然搞掂，成功借到錢。
原來銀行見到個乞兒日日都有錢存入戶口，加上通脹關係，啲人施捨畀乞兒會多啲，即收入上升；而乞兒年紀愈大，乞到錢重容易，咁梗係唔怕借畀佢啦。
不過，施老另外一個當紅明星客戶，原本諗住，問銀行借錢買樓一定冇甩拖，點知就撞板。原來銀行認為，呢個拍脫戲嘅明星，隨住年紀大，受歡迎程度下降，收入跟住少，咁供款能力就可能會有問題。樓按還款期要十幾年，變得唔夠穩陣，所以唔肯借。
當年銀行借錢畀人買樓，準則原來係咁，唔知今時今日，有冇改變呢？
外資嚟香港投資成日都有，主要係歐美、亞洲等地資金。早前長實搵嚟中東資金一齊合作，與杜拜伊斯蘭銀行合組房地產投資基金。
長實執行董事趙國雄話，自從宣布合作計劃，連中東其他國家都好有興趣，有科威特及沙特阿拉伯資金，重有因為卡塔爾半島電視台，而廣為人熟悉嘅卡塔爾，都有主動接觸佢哋，希望加入呢個投資基金，投資包括本港嘅亞洲房地產。
趙國雄話，油價升，中東國家賺到嘅油錢，資金都要尋找出路，嚟香港就大把貨揀。
噚日係有「西洋鬼節」之稱嘅萬聖節，但愈嚟愈多香港人玩埋一份。
香港置業一班員工，喺節日前夕，去到麥當勞叔叔之家，舉行「萬聖節歡樂派對善慈探訪」，同一眾癌症兒童玩遊戲與跳舞，當然唔少得大派禮物啦！
香港置業行政總裁胡日發話，咁做係想回饋社會。
信和主力促銷嘅將軍澳蔚藍灣畔，開始拆棚，入伙期近。蘭西近日經過，見到周圍搭晒棚，兼鋪咗尼龍網，貼住東港城一面，重遮晒成條街；面對海悅豪園一邊，連馬路中間安全島都遮埋，有啲去咗馬戲團嘅感覺，同一般樓盤落成拆棚情況唔同。
據了解，蔚藍灣畔發展商，要負責起兩條天橋接駁東港城，另一條連接海悅豪園，可能因為咁，先至有𠵱家嘅尼龍網陣出現。發展商都算穩陣小心嘞。
電郵地址：
