呢個周中又有歐冠盃打，不過我求大俠相信利物浦嘅領隊賓尼迪斯一定好頭痛，因為「紅軍」嘅法國前鋒施斯喺上星期六作客布力般嘅英超聯斷咗左小腿，應該提早「收咧」，利物浦嘅攻力相信一定大受影響。
話時話，布力般嘅伊活公園球場的確唔係利物浦嘅福地，喺上季「紅軍」到訪伊活公園時，就有前鋒巴路士同埋後衞加歷查分別斷足踝同埋斷腳脛，加埋今次施斯斷小腿，咪話唔邪！
其實除咗利物浦之外，另外兩隊要喺周中踢歐冠盃嘅法甲里昂同埋西甲華倫西亞，喺星期六嘅本土聯賽之後同樣增添「十字兵」；里昂喺上星期六小勝斯特拉斯堡一比○嘅比賽中，就有後衞卡卡柏膝韌帶撕裂，可能全季「長唞」，而前鋒韋托特亦勇戰受傷。至於華倫西亞嘅阿根廷中場艾馬，則喺同馬體會打和一比一時被踢傷頭暈咗，𠵱家重要留院。
有「神奇教練」之稱嘅米路天奴域，教完中國國家隊後，際遇就麻麻，教洪都拉斯國家隊唔掂之後，目前做緊卡塔爾聯賽衞冕冠軍艾沙德嘅教練。不過，艾沙德成績一樣唔好，六輪聯賽只贏咗兩場，啱啱重輸咗畀有迪保亞兄弟壓陣嘅艾拉恩二比五，唔怪得有傳米路烏紗不保啦！
前晚AC米蘭又靠射手舒夫真高後備落場入波，作客險勝森多利亞。話說呢場波之前一日，舒夫真高個囝囝（佐敦）出世，佢一榮升老竇就入波，個仔認真好腳頭。佢入波後少不免同隊友一齊作抱仔狀，而AC官方網都大事報道佐敦出世消息，佢一出世就萬千寵愛，真係恨死人。
收費台台慶，睇波觀眾最「㷫」。話說前晚國際米蘭對拉素場波，因為播廣告下半場遲咗直播，搞到觀眾唔可以第一時間睇到阿祖安奴射成一比○嘅過程。查實我哋體育版之前已收過讀者電郵，投訴好多時球賽一完即刻去廣告，睇唔到賽後點滴。希望有關方面肯正視吓。
阿仙奴領隊雲格對於羅馬尼亞射手梅度被車路士「炒魷」不感意外，重話當梅度服完停賽令，將同佢商討羅致事宜。求大俠覺得梅度嘅技術型踢法都適合「兵工廠」，最重要佢已係自由身，阿仙奴免費簽佢番去，就算唔啱使轉手賣畀人，都有筆轉會費收番，無本生利生意做得過！