好耐冇筋肉創作人EricSo消息，聽聞佢最近連鐘表設計都撈埋，創作人要向現實低頭，可見巿道仍麻麻，搵食艱難。本來想去I.T買番隻佢嘅作品支持吓，一於就去朗豪坊喇。之前廣告話朗豪坊10月底開幕，I.T會佔據個大Area，點知早兩日到訪，仍見商場內部未完工，車站位置沙塵滾滾，重未開放畀公眾，睇嚟10月底開唔切噃，一於打電話問經紀大隻標有冇料先？
大隻標話：「唔使問喇，我有個老細喺嗰度開舖，我最清楚情況！」業主雖然已經交場，但租客重未做得生意，不過業主好識做，10月中開咗小型茶會招待租客，講解場內最新情況。最新消息話約莫11月15至17日內部先正式完工，大部份租戶到時先至開門。不過有傳大租戶「西武」有理冇理，照樣趕喺11月頭營業，一於冇有怕！
講起冇有怕，I.T最膽大過人，我去睇過佢哋個舖位，重未開始裝修，十足胸有成竹咁款！不過小租戶最擔心會唔會11月頭照起租？因為合約講明起租期喺11月，業主亦已經交場，不過未開放畀公眾咁解。但業主方面亦好合作，話萬事有商量；希望到時大家可做到好生意喇！
主持人：大食Jack
八卦熱報：
